ओलीया मेगु छगः थां त्वःधुल

येँ – लुम्बिनी प्रदेशया प्रमुख अमिक शेरचनं थौं न्हिनय् ३ बजे तक मुख्यमन्त्रीया नितिं दावी यायेत ई बिउगु दु । मुख्यमन्त्री शंकर पोखरेलं म्हिगः राजीनामा बीधुंकाः न्हूम्ह मुख्यमन्त्रीइ दावी यायेत दलतय्त प्रदेश प्रमुख शेरचनं म्हिगः आह्वान यानादीगु खः ।

प्रदेशया न्हूम्ह मुख्यमन्त्रीया निंतिं आह्वान याःगु प्रेस विज्ञप्तिइ धयातःगु दु, ‘संविधानया धारा १६८ या उपधारा २ कथं प्रदेशसभाय् प्रतिनिधित्व याइगु निगू वा निगू स्वयां अप्वः दलया समर्थनय् बहुमत काये फइम्ह प्रदेश सभा दुजःयात मुख्यमन्त्री नियुक्ति यायेगु प्रयोजनया नितिं मिति २०७८ साउन २८ गते बिहीवाः न्हिनसिया ३ बजे दुने दावी पेस यायेत माननीय प्रदेश प्रमुखं प्रदेशसभाय् प्रतिनिधित्व याइगु फुक्कं दलयात आह्वान यानादीगु दु ।’

मुख्यमन्त्री पोखरेलया विरुद्ध अविश्वासया प्रस्ताव दर्ता यायेगु झ्वलय् माओवादी केन्द्रया कुलप्रसाद केसीयात मुख्यमन्त्रीइ प्रस्ताव यानातःगु दु । २०७४ सालय् क्वचाःगु आम निर्वाचनय् दकलय् तःधंगु दल जुयाः प्यंगू प्रदेशय् एमालेया सरकार दयेकूगु खः । आः वयाः एमालेया निगू प्रदेशय् जक एमालेया मुख्यमन्त्री ल्यं दनि । थ्व स्वयां न्ह्यः गण्डकी प्रदेशय् एमालेया मुख्यमन्त्री पृथ्वी सुब्बा गुरुङया सरकार क्वःदःगु खः ।

प्रधानमन्त्री केपी ओली सरकारं बहिर्गमन जुइवं धमाधम ओली विरुद्ध माधव नेपाल पुचलं केन्द्रंनिसें प्रदेशय् तकं समर्थन मयायेवं ओली पक्षीय मुख्यमन्त्रीतय् पद धरापय् लाःगु खः । बागमति प्रदेशय् नं ओली पक्षीय मुख्यमन्त्री डोरमणि पौडेल विरुद्ध अविश्वासया प्रस्ताव हयेत हस्ताक्षर यायेगु ज्या जुइधुंकूगु दुसा प्रस्ताव दर्ता यायेगु ज्या धाःसा थाति लानाच्वंगु दु । माधव पुचः व ओली पुचः दथुइ एकताया निंतिं वार्ता जुयाच्वंगुलिं बागमति प्रदेशय् पौडेल विरुद्धया अविश्वास प्रस्ताव दर्ता मजूगु खँ प्रदेशसभाया सांसदतय्सं धाःगु दु ।
आः ओली पक्षया मुख्यमन्त्री बागमति व १ नम्बर प्रदेशय् जक ल्यं दनि । तर बागमतिइ नं नेपाल पुचलं अविश्वासया प्रस्ताव दर्ता यात धाःसा सरकार संकटय् लाइगु सम्भावना दु । बागमति प्रदेशय् आः नेपाल पक्षलिसे शक्ति इना कायेगु खँ जुयाच्वंगु दु ।

अदालतं अधिवेशन मपन

लुम्बिनी प्रदेशसभाया विशेष अधिवेशन पनेत माग यासें सर्वोच्च अदालतय् दर्ता जूगु रिटय् अन्तरिम आदेश बीत अदालतं अस्वीकार यायेवं आः अन विशेष अधिवेशनया प्रक्रिया न्ह्याइगु जूगु दु । न्यायाधीश डा. आनन्दमोहन भट्टराईया इजलासं म्हिगः उगु रिटयात कयाः अन्तरिम आदेश मबिउगु खः । लुम्बिनी प्रदेशया विशेष अधिवेशन पनेमाःगु माग यासें प्रदेशसभा दुजः लीला गिरीं सर्वोच्चय् रिट दायर याःगु खः । म्हिगः लुम्बिनी प्रदेशया अधिवेशन सञ्चालन जूसां मुख्यमन्त्रीया राजीनामा वःगुलिं अधिवेशन छुं ई जक च्वनाः स्थगित याःगु दु ।

सम्बन्धित बुखँ

LEAVE YOUR COMMENTS