जिं निराश यायेमखु- कुलमान घिसिङ
येँ – नेपाल विद्युत प्राधिकरणय् थःगु पदभार लःल्हाना कासें नवनियुक्त कार्यकारी निर्देशक कुलमान घिसिङं थःत विश्वास याःपिंत निराश मयायेगु खँ धयादीगु दु । पदभार लःल्हाना कायेगु झ्वलय् सम्बोधन यासें कार्यकारी निर्देशक घिसिङ ‘थ्व पालय् अझ तःधंगु चुनौति दु’ धयादिसें थःम्हं न्ह्याब्लें चुनौतीयात स्वीकार याना वयागु खँ धयादीगु दु ।
वय्कलं धयादीगु दु, ‘थ्व जिगु व्यक्तिगत जीवनया हे दकलय् कठीन हाथ्याया ई खः । न्हूगु जोश सहित ज्या याये, ब्वहलय् ब्वह ल्वाकाः न्ह्याः वने ।’
आम जनताया चाहना व सरकारया योजनाया कारणं थः प्राधिकरणय् हाकनं वयेखंगु धासें वय्कलं थुकिया निंतिं ग्वाहालि यानादीपिं सकसितं सुभाय् नं बियादीगु दु ।
थःगु न्हापांगु कार्यकालय् देय्यात लोडसेडिङ्गपाखें मुक्त यानाः विद्युत प्राधिकरणयात अर्बौ तकाया नाफाय् यंकूम्ह घिसिङयात न्हूगु सरकार गठन जुइवं प्रधानमन्त्री शेरबहादुर देउवाया हे पहलय् प्राधिकरणय् हाकनं नियुक्त याःगु खः । थ्वयां न्ह्यः ओली सरकारं घिसिङया कार्यकाल थप मयासे हितेन्द्रदेव शाक्ययात कार्यकारी निर्देशक दयेकूगु खः ।
सोमवाः जूगु मन्त्रिपरिषद्या बैठकं घिसिङयात प्राधिकरणया कार्यकारी निर्देशकय् नियुक्ती यायेगु व शाक्ययात प्राधिकरण कया वयाच्वंगु सुविधा बराबरया सुविधा बिइगु कथं जल तथा ऊर्जा आयोगय् विशिष्ट श्रेणीइ पूर्णकालिन सदस्य नियुक्त यायेगु निर्णय याःगु खः ।
कार्यकारी निर्देशक घिसिङं सरकारं शाक्यया विज्ञतायात ऊर्जा क्षेत्रया विकासय् छ्यलेगु निंतिं जल तथा ऊर्जा आयोगय् यंकूगु खँ नं धयादीगु खः । पदबहाली ज्याझ्वलय् न्ववायेगु झ्वलय् वय्कलं आः दयेकाच्वंगु आयोजनात याकनं क्वचायेकेगु निंतिं नं थःगु विशेष पहल जुइगु खँ धयादीगु दु । थ्व झ्वलय् वय्कलं स्वनिगलय् मतया तार भूमिगत यायेगु निंतिं जुयाच्वंगु ज्या प्रभावकारी मजूगु धासें तुरुन्त हे निर्माण व्यवसायीत सःताः सहलह यायेगु खँ नं धयादीगु खः ।
LEAVE YOUR COMMENTS