पशुपतिया सिसीटिभी भारतयाके
एसबीआई बैंकं चले यानाच्वन पशुपतिया सिसीटिभी
येँ – नेपाःमि जनतां अतिकं आस्था तइगु धार्मिकस्थल मध्ये छगू पशुपतिनाथ । थ्व थाय्या सुरक्षायात ध्यानय् तयाः थौंकन्हय् अन थीथी थासय् ग्वलंग्वः सिसीटिभी तया तःगु दु । तर सिसीटिभीया मोनिटरिङ धाःसा अन हे च्वंगु एसबीआई बैंकं यानाच्वंगु खँ सीदुगु दु ।
वंगु छुं ई न्ह्यवंनिसें पशुपति देगः दुने भक्तजनतय्गु सामान खुया यंकेगु ज्या यक्व जुल धाःगुलिं थ्व खुइपिं पत्ता लगे यायेत अन तयातःगु सिसीटिभीया ग्वाहालि कायेगु कुतः जूगु खः । तर उकिया मोनटरिङ सुनां याइ धइगु खँ हे मसियाः थ्व ज्या मन्ह्यात ।
लिपा ‘न्यूज २४’ च्यानलया लोकंह्वाःम्ह पत्रकार रवि लामिछानें सिसीटिभीया फुटेज माल धकाः पशुपति विकास कोषयाके माग याःबलय् कोशं थुकिया मोनिटरिङ थःपिंसं मखु प्रहरीं याइ धकाः लिसः बिया हल । प्रहरीयाके न्यंबलय् प्रहरीं नं थःपिंसं मखु कोषं हे याइ धयाहल । लिपा थीथी थासय् न्यनेकने याःबलय् सी दत, थुकिया मोनिटरिङ ला एसबीआई बैंकं याइगु जुयाच्वन ।
बैंकयाके वनाः न्यंबलय् बैंकं सिसीटिभीया फुटेज बीत माने मजू । पत्रकार लामिछानें सिसीटिभी सम्बन्धी थ्व खँयात थःगु ज्याझ्वः मार्फत प्रशारण नं यानादीधुंकूगु दु । तर नं पशुपति विकास कोष व प्रहरीपाखें थुकी छुं हे ध्यान मतःगु खनाः धाःसा स्थानीय जनता अजूचायाच्वंगु दु । एसबीआई बैंक धइगु भारतं सञ्चालन याइगु खः ।
छगू भारतीय बैंकयात पशुपतिनाथ थेंज्याःगु महत्वपूर्ण थाय्या सिसीटिभी मोनिटरिङ यायेगु जिम्मा सुनां बिल धइगु खँ रहस्यमय जूगु दु । पशुपति दुने थौंकन्हय् अज्याःथाय् तकं सिसीटिभी तयातःगु दु गन सर्वसाधारणं फोटो तकं काये मदु । दुहां वनेगु ला सम्भव हे मदु । अज्याःगु गोप्य थाय्या भिडियो खिचे यायेगु जिम्मा छगू भारतीय बैंकयात बियातःगु खँय् स्थानीय जनता आक्रोशित जुयाच्वंगु दु ।
भारतीय बैंकयात अज्याःगु जिम्मा बियातःगुलिं पशुपतिया सम्पूर्ण गतिविधि भारतय् थ्यनीगु खँय् नं उमिसं चिउताः प्वंकूगु दु ।लिसें सिसीटिभीया मोनिटरिङ सुनां यानाच्वन धइगु खँ कोष व प्रहरीं तकं मसिउगु खँयात नं स्थानीय जनतां रहस्यमय रुपं काःगु दु ।
LEAVE YOUR COMMENTS