फ्रेन्डसया न्हापांगु विजय, आर्मी निगूगु थासय् वल

येँ – शहीद स्मारक ए डिभिजन लिग अन्तर्गत म्हिगः जूगु कासाय् फ्रेन्डस क्लबं मछिन्द्र क्लबयात ३–० गोलं बुकल । फ्रेन्डसया थ्व सिजनय् थ्व न्हापांगु जीत खः । थ्वयां न्ह्यः जूगु प्यंगू कासाय् फ्रेन्डस स्वंगुलिइ पराजित जूगु खःसा छगुली जक बराबरी म्हितूगु खः । फ्रेन्डसया निंतिं विदेशी कासामि फोफाना ब्राहिमान, संजोक महर्जन व अनिल महर्जनं छगू छगू गोल याःगु खः ।

थ्व विजय लिपा फ्रेन्डस ४ अंक सहित ल्याः धलखय् गुंगूगु थासय् दुसा बूगु मच्छिन्द्र २ अंक कयाः झिंनिगूगु थासय् दु । म्हिगः हे जूगु मेगु कासाय् त्रिभुवन आर्मीं हिमालयन शेर्पायात २–१ गोलं बुकल । थ्व विजय लिपा आर्मी १३ अंक सहित ल्याः धखलय् निगूगु थासय् थहां वःगु दु । आर्मीया निंतिं भरत खवासं हे निगुलिं गोल याःगु खःसा हिमालयन शेर्पाया निंतिं अलरिच सिवें छगू जक गोल याःगु खः ।

भरतं कासाया ३३ औं मिनेटय् सन्तोष तामाङया कर्नरय् हेडपाखें न्हापांगु गोल याःगु खः । न्हापांगु हाफय् थ्व बाहेक मेगु गोल जुइमफुत । लिपांगु हाफय् नं कासा क्वचायेत्ययेकाः ८६ औं मिनेटय् भरतं थप छगू गोल याःगु खः । रिबाउन्डय् वःगु बलय् भरतं गोल याःगु खः । थ्वयां छुं भचा लिपा हे अलरिचं छगू गोल यासें गोल अन्तर म्हो यानाबीगु खः ।