कुवेतपाखें नेपाः पराजित

येँ – सन् २०२२या विश्वकप फुटबलया छनोट चरण अन्तर्गत मंगलवाः जूगु कासाय् नेपाः कुवतेपाखें ०–१ गोलं बूगु दु । नेपाःया दशरथ रंगशाला तयार मजुइवं तटस्थ मैदान कथं भूटानय् जूगु कासाय् नेपाः पराजित जूगु खः । थ्वयां न्ह्यः जूगु न्हापांगु लेगया कासाय् नं नेपाः ७–० गोलं बूगु खः ।

म्हिगः जूगु कासाय् कुवेतया निंतिं २८ औं मिनेटय् कप्तान बदर अल मतवाः छगू जक विजय गोल याःगु खः । नेपाःयात नं गोल यायेगु बांबांलाःगु ह्वःताः चूलाःगु खःसां सुजल श्रेष्ठ व अभिषेक रिजालं उकियात सदुपयोग यायेमफुत । विमल घर्तीमगरयात अनुशासनया कारवाही यानाः टिमं लिकायेवं अभिषेक रिजालयात अग्रपंक्तिया जिम्मेवारी बिउगु खः ।

घर्तीमगर लिसें बन्द प्रशिक्षणय् च्वनाच्वंपिं अञ्जन विष्ट, दिनेश राजवंशी, सन्तोष तामाङ क्याम्प त्वःताः चान्हय् डिस्कोय् वःगु प्रमाणित जुइवं उमित टिमं लिकाःगु खः । होम एण्ड अवे अन्तर्गत निगूगु लेगया कासाय् नेपालय् जुइमाःगु खः । तर एशियाली फुटबल महासंघया प्रतिनिधितय्सं याःगु सर्वेक्षणय् येँया रंगशाला तयार मजूगु प्रतिवेदन बिइवं खेलस्थल सरे याःगु खः।

थ्व लिपा कुवेतं कतारय् कासा म्हितेगु निंतिं एन्फायात इनाप याःगु खःसां एन्फां नेपाःया वातावरण लिसे ज्वःलाःगु भूटानया थिम्पुइ च्वंगु चाङलिमिथाङ रंगशाला ल्यःगु खः । विश्वकप छनोट अन्तर्गत नेपालं आः अष्ट्रेलिया व चाइनिज ताइपेइ लिसे निगू कासा म्हिते ल्यं दनि । थ्व निगुलिं कासा धाःसा येँया दशरथ रंगशालाय् जुइगु खँ धाःगु दु ।