येँ महानगरया कार्यपालिकाया बैठक क्वचाल
येँ – येँ महानगरपालिकाया कार्यपालिकाया बैठक क्वचाल । वंगु मंगलवाः च्वंगु कार्यपालिकाया ६६ क्वःगु बैठक खुगू कार्यविधि संशोधनसहित पारित यासें क्वचाःगु खः ।
येँ महानगरपालिकाया प्रमुख विद्यासुन्दर शाक्यया अध्यक्षताय् च्वंगु बैठकं ‘यँयाः जात्रा पर्व संरक्षण अक्षय कोष संचालन कार्यविधि–०७८’, ‘सम्पदा भवन संरक्षण व निर्माण मापदण्डलिसें सहुलियत कार्यविधि–०७८’, ‘लैङ्गिक हिंसा निवारण कोष सञ्चालन कार्यविधि — ०७८’, छात्रवृत्ति कार्यविधि–०७८’, ‘राजस्व छुट मिनाहासम्बन्धी कार्यविधि–०७८’, मानव बेचविखन तथा ओसार पसार नियन्त्रण कार्यविधि–०७८’ पारित याःगु खः ।
बैठकय् कार्यपालिकाया दुजःपिंसं तयादीगु संशोधनसहितया बुँदात विधायन समितिइ सहलह यानाः कार्यविधियात अन्तिम रुप बीगु बैठकया अध्यक्षता यानादीम्ह महानगर प्रमुख शाक्यं बैठकय् जानकारी याकादीगु खः ।
बैठकय् विधायन समितिया सदस्य सचिवलिसें महानगरया निर्देशक वसन्त आचार्यं कार्यविधिया मुख्य विशेषतासहितया मस्यौदा न्ह्यब्वयादीगु खः । उगु मस्यौदाय् कार्यपालिकाया दुजःपिं रमेश डंगोल, शुद्धकुमार डंगोल, नीलकाजी शाक्य, मचाराजा महर्जन, शोभा सापकोटा, मोहन विष्ट लगायतं थःथःगु धारणा तयादीगु खः ।
पारित जूगु कार्यविधिमध्ये यँयाःसम्बन्धी कार्यविधिइ जात्रा संचालन यायेत आवश्यक जुइगु खर्च व जात्रा संचालनया विषय दुथ्यानाच्वंगु दु । थुगु कार्यविधिकथं येँ महानगरपालिकां निगू करोड, नेपाल सरकारं छगू करोड न्यय्गू लख, प्रदेश सरकारपाखें छगू करोड व गुथि संस्थानपाखें न्यय्गू लख यानाः मुक्कं न्यागू करोडया अक्षय कोष नीस्वनीगु जूगु दु । थुगु कोषया संचालन महानगर प्रमुखया अध्यक्षता गठन जुइगु समितिं याइ धाःगु दु ।
लैंगिक हिंसा कार्यविधिइ उपचार यायेमाःगु अवस्थाय् नीद्वः तका व कानूनी उपचारया निंतिं झिंन्याद्वः तका ग्वाहालि यायेगु खँ न्ह्यथनातःगु दु । अथे हे छात्रवृत्ति कार्यविधिइ गरिब, विपन्न व जेहेन्दार विद्यार्थीयात उच्च शिक्षाया निंतिं एकमुष्ट छात्रवृत्ति उपलब्ध याकीगु जूगु दुसा महानगरया शिक्षा ऐनकथं संस्थागत विद्यालयं १० प्रतिशत छात्रवृत्ति बीमाःगु व्यवस्था याःगु दु ।
भवन निर्माण मापदण्ड कार्यविधिइ महानगर दुने निर्माण जुइगु निजी व संस्थागत भवनया पिनेया स्वरुप हिलेत प्रोत्साहन याःगु दु । कार्यविधिकथं सम्पदा भवन दयेकेत म्होतिं नं ८ गू लखनिसें अप्वलय् ३२ गू लख तक अनुदान बीगु जूगु दु ।
LEAVE YOUR COMMENTS