थिमिइ नीछदँ लिपा भैलः प्याखं

येँ (नेपालभाषा टाइम्स)- नीछदँ न्ह्यवंनिसें दिनाच्वंगु थिमिया भैलः प्याखं हाकनं हुइकीगु जूगु दु । भाद्रकृष्ण दुतिया निसें पञ्चमी तक प्यवाः थुगुसी थिमिया ताहाननी हुइकेत्यंगु खः । प्याखं हुइकेगु नितिं वंगु गुरु पुन्हि निसें प्रशिक्षण न्ह्यायेधुंकूगु दु ।

थिमि भैलः प्याखनय् न्हापा भैलः छम्ह, लिपा भैलः छम्ह, ज्यापुंगः छम्ह, न्हापा दागिं छम्ह व लिपा दागिं छम्ह यानाः मुक्कं न्याम्ह द्यःपिं दइ । अशोक प्रजापति न्हापा भैलः, बालमुकुन्द प्रजापति लिपा भैल, आयुष प्रजापति न्हापा दागिं (कुमारी), साहिल प्रजापति लिपा दागिं (महालक्ष्मी) व ज्यापुंगचा (हरिसिद्धि) इ कृशल प्रजापतिं प्याखं हुलीगु खँ भैलः प्याखं व्यवस्थापन समितिया उपाध्यक्ष बलराम प्रजापतिं कनादीगु दु ।

थिमिया जीवित सांस्कृतिक धरोहर व परम्परागत प्याखंलिसे बाद्य गुरु श्रीगोपाल प्रजापतिया नेतृत्वय् गुरुपिं कृष्णबहादुर प्रजापति, बालकृष्ण प्रजापति, चन्द्रभक्त प्रजापति व प्रेमकृष्ण प्रजापतिं प्याखंया प्रशिक्षण बियाच्वंगु दु ।

उकथं हे धाः बाजं, भुस्याः, मुवाली व प्वंगा थाइपिं स्वंगू दर्जनया ल्याखय् दुगु जानकारी नं वय्कलं बियादीगु दु । वय्कःया कथं थुगु प्याखं हुइकेगु नितिं म्होतिं नं न्यय्म्ह कलाकारपिनि सहभागिता दइ ।

किंबदन्ती कथं परापूर्वकालय् थिमि क्षेत्रया जनतायात भूतप्रेतं तसकं दुःख बीगु यानाच्वंगु खः। चान्हय् जक मखुसें न्हिनय् नं दुःख बीवं बुँज्या याइपिं बुँज्या यायेत वनेत ग्यात । वयां लिपा जुजुं तान्त्रिक, विद्वान, नांजाःपिं शास्त्रविज्ञतलिसे सहलह यानाः तान्त्रिकया रुपय् भैरवयात जगे यानाः त्वाःत्वालय् क्रोधित मुद्राया प्याखं हुइकल धाःसा भूतप्रेत बिसिउँ वनिगु व गबलें लिहां सुझाव बिउगुलिं भैलः प्याखं हुइकेगु ज्या जूगु खः ।