नवःगु अचार नकूगुलिं २ लाख बं

येँ (नेपालभाषा टाइम्स)÷येँ महानगर–पालिकां नवःगु अचार मिउगु धासें बर्गर हाउस एन्ड क्रन्चि फ्राइड चिकेनयात बं पुइकूगु दु । कलंकीइ च्वंगु उगु बर्गर हाउसं अनलाइन ममः अर्डर याःपिं ग्राहकयात नवःगु व अस्वस्थ्यकर अचार छ्वःगु लुइवं २ लाख तका बं पुइकूगु खँ येँ मनपां धाःगु दु ।

वंगु असार २६ गते बहनीपाखे अनलाइन अर्डरय् बर्गर हाउसं उपभोक्तायात छ्वःगु ममःया अचार नवःगुलिं उपभोक्तापाखें उगु खँ बर्गर हाउसयात जानकारी याकूगु खःसा वयां लिपा बर्गर हाउसं मेगु अचार छ्वःगु खः । उगु अचार नं नवयेवं उपभोक्तां थ्व खँ महानगर प्रहरी बलयात जानकारी बिउगु खः । वयां लिपा छानबिन यायेगु झ्वलय् नसात्वँसाय् स्वच्छता मदुगु पुष्टि जुइवं कारबाही यानागु खँ येँ मनपां धाःगु दु ।

थ्व स्वयां न्ह्यः येँ मनपां थःगु हे ज्याकुथिइ सञ्चालन यानाच्वंगु नारायणी चमेना गृहयात २ लाख तका बं पुइकूगु खः ।