फागुन तक नं ज्या शुरु मजूसा बजेट बन्द
येँ – न्ह्याबलें नं आर्थिक वर्षया अन्त्यपाखे ज्या शुरु यानाः बजेट जक पचे याइगु प्रवृत्ति अन्त्य यायेगु लागिं पलाः न्ह्याकीगु जूगु दु । थुकिया लागिं आः सरकारं ध्यबा बी धकाः निर्धारण याना तयेधुंकूगु परियोजनात मध्ये नं गुगु परियोजना फागुन मसान्त तक नं ज्या शुरु जुइ मखु अज्याःगु परियोजनायात चैत महिनांनिसें हे बजेट रोके यायेगु खँ धाःगु दु । अर्थ मन्त्रालयं आः नकतिनि च्वंगु अर्ध वार्षिक बजेटया समीक्षा बैठकं थ्व निर्णय याःगु खः । बजेटय् परियोजना दुथ्याःसां ज्या मयाइगु व असारं न्हूगु बजेट वइगु ई जुल कि बैशाखं हथासं ज्या शुरु यानाः बजेट पचे याइगु चलनया अन्त्य यायेगु लागिं अर्थं थज्याःगु नीति हयेत्यंगु खः । असारं न्हूगु बजेट वये न्ह्यः हे पुलांगु बजेट सिधयेकेमाः धकाः वैशाख जेठ महिनाय् हथासं ज्या याइबलय् बांलाक ज्या मजुइगु व अज्याःगु ज्या गुणस्तरीय नं मजुइगु जूगुलिं थज्याःगु प्रवृत्तिया आलोचना जुया वयाच्वंगु खः ।
उकिं अज्याःगु प्रवृत्तिया अन्त्य यायेगु लागिं यदि फागुन तक छुं नं परियोजनाया प्रारम्भिक ज्या शुरु मजुल धाःसा चैतंनिसें अज्याःगु परियोजनाय् वनाच्वंगु बजेट स्वतः बन्द जुइगु नीति दयेकेत्यंगु खः । अन बन्द जूगु बजेटयात मेगु बांलाःगु व याकनं ज्या जुयाच्वंगु परियोजनाय् सारे याना बीगु खँ नं मन्त्रालयं धाःगु दु । मन्त्रालयय् जूगु बजेटया अर्ध वार्षिक समिक्षाया झ्वलय् चालु आर्थिक वर्षया बजेटं गुलि ज्या यानाच्वन धकाः मूल्यांकन यायेगु ज्या जूगु खः । मन्त्रालय सूत्रं धाः कथं आर्थिक वर्ष ०७३÷७४ या बजेटया आपालं दां नं खर्च हे याये मफुगु अवस्था जुयाच्वंगु दु । थ्व आर्थिक दँया बजेट आः तकया दुने २३ प्रतिशत दां जक खर्च जूगु खने दुगु दु । सरकारं राजश्व उठे यायेगु ज्या धाःसा निर्धारित लक्ष्य कथं याःसां खर्च धाःसा याये मफुगुलिं बजेटय् फ्यायेधुंकूगु ध्यबा तकं थाति लाइगु खने दयाच्वंगु दु । थुगु दँया बजेट लागू जूगु च्याला दयेधुंकल । आः केवल प्यलाया दुने फुक्क बजेट खर्च याये फइ मखु । बजेटया १९९ अर्ब तका दां थ्व दँय् खर्च हे मजुइगु खने दुगु खँ नं धाःगु दु ।
LEAVE YOUR COMMENTS