राजधानीया थाय्थासय् सिज

येँ (नेपालभाषा टाइम्स) – येँय् दुने धमाधम कोरोना संक्रमित जूपिनि ल्याः अप्वया वयेवं थाय्थासय् सिल यानाः पीसीआर परीक्षण यायेगु ज्या तीव्र याना हःगु दु ।

म्हिगः येँया २२ वडाय् वटु, महाबौद्ध, फसिक्यब लागा बन्द यासें अनया तःधं बहालय् स्थानीय मनूतय् पीसीआर परीक्षण याःगु खः । २२ वडाया अध्यक्ष चिनीकाजी महर्जनं ‘नेपालभाषा टाइम्स’ यात कनादी कथं म्हिगः अन खास यानाः सार्वजनिक रूपं सक्रिय जुइपिं पसल्या, दुरु बीपिं, लः तः वनीपिं, सँ चायेगु पसः आदिया मनूतय्त केन्द्रित यानाः परीक्षण याःगु खः । थुकी १२९ म्हेस्यां ब्वति काःगु खःसा थुकिया रिपोर्ट स्वन्हु प्यन्हु लिपा वइ धाःगु दु। रिपोर्ट मवःतले उगु क्षेत्रय् जुयाच्वंगु सिल कायम हे जुइ ।

अथे हे म्हिगः येँ मनपा १४ वडाय् लाःगु सुनार गामय् नं सिज याःगु दु। अन छगू हे परिवारया न्याम्ह मनू कोरोना पोजिटिभ खने दयेवं वडा ज्याकूया रोहवरय् मुक्कं लागा सिज याःगु खः ।

थ्वहे झ्वलय् म्हिगः येँ जिल्लाय् जक ११० म्ह कोरोना संक्रमित लूगु दु। अथे हे यलय् १६ म्ह व ख्वपय् च्याम्ह संक्रमित लूगु दु। अथे हे अख्तियार दुरुपयोग अनुसन्धान आयोगया प्रमुख आयुक्त नविन घिमिरेयात नं कोरोना जूगु दु। अख्तियारया ५० म्ह कर्मचारीयात कोरोनां कयाच्वंगु दु ।