डेल्टाया प्रजातिया न्हूगु म्युटेन्ट लूगु पुष्टि

येँ- नेपालय् कोरोनाया न्हूगु भेरियन्ट लुया वःगु पुष्टि याःगु दु । स्वास्थ्य मन्त्रालयपाखें आः नकतिनि पित बिउगु छगू विज्ञप्तीकथं नेपालय् कोभिड –१०या ‘डेल्टा’ प्रजातिया न्हूगु म्युटेन्ट लुया वःगु पुष्टि याःगु खः ।

मन्त्रालयया सहप्रवक्ता डा. समिर अधिकारीं जारी यानादीगु विज्ञप्तीइ नेपालय् कोरोना भाइरस (कोभिड–१९)या डेल्टा प्रजातिया मेगु न्हूगु म्युटेन्ट लुया वःगु पुष्टि याःगु दु । मन्त्रालयं पिथंगु विज्ञप्तीइ नेपाःया ४७ गू नमूना परीक्षा याःगुलिइ डेल्टाया न्हूगु भेरियन्ट लूगु खँ धयातःगु दु । विज्ञप्तीइ धयातःकथं नमूना परीक्षण याःगुलिइ स्वंगू नमूनाय् डेल्टाया न्हूगु भेरियन्ट लुया वःगु खँ धाःगु दु ।

न्हूगु डेल्टा म्युटेन्टयात ‘एवाइवान’ नां बिउगु दु । विज्ञप्तीइ जेठया मध्यनिसें असारतकया दुने देय्या थीथी थासय् थीथी उमेर समूहया व्यक्तिपाखें काःगु नमूना परीक्षणय् न्हूगु म्युटेन्ट लुया वःगु पुष्टि जूगु खँ धयातःगु दु ।

कोरोनाया न्हूगु भेरियन्ट लुया वःगु पुष्टि जुइवं मन्त्रालयं जनस्वास्थ्या सुरक्षा मापदण्ड कडा रुपं पालना यायेत सर्वसाधारणयात इनाप नं याःगु दु । न्हूगु भेरिन्ट व म्युटेन्टं दक्वं उमेर समूहयात लिच्वः लाके फुगु धासें स्वास्थ्य मापदण्ड पालना यायेत इनाप याःगु दु । लिसें सम्भावित स्वंगूगु लहरं वयेफगु चुनौतिपूर्ण अवस्थाया निंतिं आवश्यक तयारी यायेत नं इनाप याःगु दु ।

सम्बन्धित बुखँ

LEAVE YOUR COMMENTS