पहिचान आन्दोलन जारी, आः विराटनगरय् मनू क्वत हयेगु तयारी
येँ (नेपालभाषा टाइम्स)-कोशी प्रदेश नां विरुद्ध जुयाच्वंगु आन्दोलन– यात आः विराटनगर केन्द्रित यानाः तःधंक न्ह्याकेगु खँ वःगु दु । प्रदेश नं १ पुनःनामाकरण आन्दोलनया संयोजक प्रेम यक्तेनं फोनिजया २४ क्वःगु स्थापना दिवसया ज्याझ्वलय् न्ववासें थ्व खँ धयादीगु खः ।
‘विराटनगरय् जुइगु आन्दोलनया सः जक प्रदेश सरकार, प्रदेश संसदं ताइगु खःसा झिंप्यंगुलिं जिल्लायापिं मनूत प्रदेश राजधानीइ क्वत हयेत जिपिं तयार दु’ संयोजक यक्तेनं धयादिल ।
पुनःनामाकरण आन्दोलन क्वचाःगु वा सिथिल जूगु मखु, वा वइगु मौसम जूगुलिं आन्दोलनकारीत वये–वने यायेत थाकुइगुलिं भचा दिपाः जक काःगु खः धासें वय्कलं आः नं जिल्ला जिल्लाय्, गांगामय् मनूतय्त संगठित यायेगु, प्रशिक्षण बियाः आन्दोलनया तयारी जुयाच्वंगु दु धयादिल ।
प्रदेशया नां दुई तिहाइ बहुमतं तयेधुंकूगुलिं थुकियात हिले फइमखु धकाः पहिचान विरोधीतय्सं झंगः खँ ल्हानाच्वंगु दु धासें वय्कलं सांसद, दलतय्सं चाहे जूसा आः नं नां हिले फइगु खँ कनादिल । प्रदेश मुख्यमन्त्री उद्वव थापां नकतिनि नां हिलेगु खँय् सहलह याये धाःगु खँय् विश्वास मदुगु खँ नं वय्कलं कनादिल ।
‘सरकार धाथें गम्भीर खःसा वक्तव्यबाजी यानाच्वनां मजिउ । कोशी नां लित कायेकेगु नितिं सांसदतय् हस्ताक्षर मुंकेमाल, अले विश्वास यायेगु जुइ’ वय्कलं धयादिल ।
थ्वयां न्ह्यः ज्याझ्वलय् न्ववासें संघीय मामिला तथा सामान्य प्रशासन मन्त्री अमनलाल मोदीं पहिचानया सः थ्वयेका वयाच्वंगु माओवादीयात विश्वास यानाः निर्वाचनय् बहुमत वइकथं त्याका मछ्वःगुलिं थज्याःगु अवस्था वःगु द्वपं बियादीगु खः । तर थुकियात यक्तेन लिसें मेपिं सहभागीपिंसं अस्वीकार यासें यदि माओवादी पहिचानया पक्षधर खःसा थ्व नामय् छाय् समर्थन यात धकाः न्ह्यसः तःगु खः ।
ज्याझ्वलय् फोनिजया केन्द्रीय नायः गजुरधन राईं प्रदेश नं. १ या नां कोशी तःगु विरोधय् जुयाच्वंगु पहिचानया आन्दोलनयात तिबः बीत फोनिजया ज्याझ्वः प्रदेश १ या राजधानीइ याः वयागु खः धयादिल । थ्व आन्दोलनबारे मेचींनिसें महाकाली तकया मनूतय्सं सीमा धकाः पहिचानवादी पत्रकारतय्त विराटनगरय् मुंकागु खः धकाः नं वय्कलं धयादिल ।
LEAVE YOUR COMMENTS