कोरोना संक्रमितया ल्याः न्हियान्हिथं अप्वः

येँ – सरकारं तयातःगु निषेधाज्ञा छ्वासुकेवं स्वनिगः लगायत देय्न्यंकं कोरोना संक्रमित मनूतय् ल्याः न्हियान्हिथं अप्वया वनाच्वंगु दु । म्हिगः जक देय्न्यंकं ३८९९ म्ह कोरोना संक्रमण पुष्टि जूगु दु ।

म्हिगः देय्न्यंकं १२,६५५ म्हेसिया पीसीआर परीक्षण याःगु खःसा उकी २७२६ म्ह व ४८६३ म्हेसिया एन्टिजेन परीक्षण याःबलय् उकी ११७३ म्ह यानाः मुक्कं ३८९९ म्हेसिके कोरोना संक्रमण लूगु खँ स्वास्थ्य तथा जनसंख्या मन्त्रालयं धाःगु दु । उकथं हे म्हिगः जक कोरोनां कयाः २० म्ह सीगु दुसा १७७८ म्ह कोरोना संक्रमण मुक्त जूगु दु ।

म्हिगः तक नेपालय् कोरोना संक्रमित जूपिनिगु ल्याः ६ लाख ८५५७३ म्ह थ्यंगु दुसा ६ लाख ७९ हजार संक्रमणं मुक्त जूगु दु । अथे हे सीपिनिगु ल्याः नं आः तक ९७५८ म्ह थ्यंगु दु ।

मन्त्रालयया कथं थौंकन्हय् देय्न्यंकं सक्रिय संक्रमित ल्याः २८ हजार ८३६ म्ह दु । गुकी मध्ये २५ हजार ९३८ म्ह होम आइसोलेसनय् च्वनाच्वंगु दुसा २८९८ म्ह संस्थागत आइसोलेसनय् च्वनाच्वंगु दु । कोराना संक्रमित मध्ये ६११ म्ह आईसीयु व १७१ म्ह भेन्टिलेटरय् वासः याकाच्वंगु दु ।

मन्त्रालयया कथं झिदँ स्वयां क्वय्यापिं ७९ म्ह मस्त नं कोरोना संक्रमित जूगु दु । अथे हे ११ निसें २० दँ तकया २५३ म्हेसिके कोरोना संक्रमण पुष्टि जूगु खँ मन्त्रालयं धाःगु दु ।

नेपालय् आः तक ३४ लाख ६२ हजार ३४० म्हेस्यां कोरोना विरुद्धया न्हापांगु खोप कायेधुंकूगु दुसा १४ लाख ५७ हजार ६७० म्हेस्यां निगुलिं डोज कायेधुंकूगु दु । आः मस्तय्त नं खोप बीगु तयारी सरकारं यानाच्वंगु दु ।

सम्बन्धित बुखँ

LEAVE YOUR COMMENTS