विषालु तरकारी नकूसा सरकार क्वःथलेगु ख्याच्वः

येँ – नेकां भातृ संगठन नेविसंघं भारतं आयात जुइगु तरकारी व फलफूलय् विषादी परीक्षण मयायेगु सरकारया निर्णय खारेज यायेमाःगु माग यासें प्रधानमन्त्रीयात ज्ञापनपौ बिउगु दु । येँया प्रमुख जिल्ला अधिकारी रामप्रसाद आचार्य मार्फत नेविसंघं उगु ज्ञापनपौ बिउगु खः । उकी निर्णय तत्काल खारेज मयात धाःसा सतक आन्दोलनं सरकार क्वःथलेगु ख्याच्वः नं बियातःगु दु ।

सरकारं भारतं आयात याःगु तरकारी व फलफूलया विषादी परीक्षण मयायेगु निर्णय यायेवं नेविसंघं देय्न्यंकं प्रदर्शन याना वयाच्वंगु दु । थ्वहे झ्वलय् तरकारी व फलफूलय् विषादी परीक्षण अनिवार्य यायेमाःगु माग यासें सर्वोच्च अदालतय् रिट दर्ता जूगु दु । स्वतन्त्र राष्ट्रिय अभियानया पाखें अधिवक्ता स्वागत नेपाल व नारायणप्रसाद दुवाडीं रिट तःगु खः ।

रिटय् भारतं वइगु व नेपालय् हे उत्पादन जुइगु तरकारी व फलफूल अनिवार्य रुपं परीक्षण यानाः जक उपभोक्ताया दथुइ छ्वयेमाःगु माग यानातःगु दु । विषादीयुक्त तरकारी व फलफूलं गर्भय् च्वंपिं मस्तय्त लिच्वः लाकीगु व स्वस्थ नसा नयेदइगु नागरिकया हक जूगुलिं मेसिन मदुगु बहानाय् विषादीयुक्त तरकारी मी मदइगु रिट निवेदकया जिकिर दु ।