ललिता निवासय् मनपाया घेरा

येँ (नेपालभाषा टाइम्स)- येँ महानगरपालिकां बालुवाटारस्थित ललिता निवासया जग्गा तारबार याइगु जूगु दु । म्हिगः महानगर प्रहरीया पुचः बालुवाटारय् वंगु खः । आः ललिता निवासया जग्गा क्वःछीगु व वयां लिपां तारबार यायेगु खँ महानगर प्रहरीं धाःगु दु । ललिता निवासया १४३ रोपनी जग्गा व्यक्तिया नामय् यंकूगु द्वपनय् १७५ म्हेसित विशेष अदालतय् मुद्दा न्ह्यनाच्वंगु दु ।

जग्गा व्यक्तिया नामय् नामसारी यायेगु झ्वलय् सरकारी भ्वं किर्ते याःगु द्वपनय् प्रहरीया केन्द्रीय अनुसन्धान ब्युरो हाकनं फाइल चायेकाः अनुसन्धान न्ह्याकूगु दुसा प्यम्हेसित ज्वनाः कुनातःगु दु ।

महानगर प्रहरीं ललिता निवास क्षेत्रया सार्वजनिक जग्गाय् दयेकातःगु अस्थायी टहरा चीकेत निर्देशन बिउगु दु । महानगरं ललिता निवासया जग्गाय् दयेकातःगु फुक्कं अस्थायी संरचना चीकाः तारबार यायेत्यंगु खः । उकथं हे पक्की जुइक दयेकातःगु संरचना बारे मेगु निर्णय यानाः कारबाही यायेगु तयारी जुयाच्वंगु दु । ललिता निवास जग्गाय् थौंकन्हय् २५ गू टहरा दयेकाः गोदाम व पसः तयातःगु दु ।

थ्वहे झ्वलय् पुलांम्ह प्रधानमन्त्री लिसें नेपाल समाजवादी पार्टीया अध्यक्ष डा. बाबुराम भट्टराईं ललिता निवास जग्गा प्रकरणय् थःगु स्वार्थ मस्वाःगु खँ धयादीगु दु । वय्कलं म्हिगः सामाजिक सञ्जाल ट्वीटरय् पोष्ट यासें उगु खँ धयादीगु दु ।

ललिता निवास प्रकरणय् तत्कालीन प्रधानमन्त्री भट्टराईया नं नां स्वायेवं वय्कलं सामाजिक सञ्जालपाखें उकिया खण्डन यानादीगु खः । लिसें वय्कलं ललिता निवास प्रकरण लिसे फुक्कं कथंया भ्रष्टाचार काण्डया निष्पक्ष छानविन यानाः दोषीयात कारबाही यायेमाःगु खँ नं धयादीगु दु ।

फुक्कं खँ आः थःत लुमं मजू धासें वय्कलं च्वयादीगु दु, ‘जितः भतिचा लुमं कथं राज्यया समरजंग कम्पनीया नामय् दर्ता जूगु थ्यंमथ्यं स्वपी जग्गा पशुपति टिकिन्छा गुथिया धइगु जूगुलिं वास्तवित तथ्य प्रमाण अभिलेख जाँचबुझ यानाः नियम कथं यायेगु वा थज्याःगु हे आशयया नीतिगत निर्णय जूगु थें ताः । थ्व खँ जिं अख्तियारया पुचलं छुं दँ न्ह्यः काःगु बयानय् नं धयागु दु । तत्कालीन प्रमया हैसियतं जिलिसे स्वाःगु खँ थुलि जक खः, वयां लिपा छु छु जुल जिं सीगु खँ नं मखु । गुगुं नं कथं थुगु प्रकरणय् जि वा जिलिसे सतीपिं सुं नं व्यक्तिया स्वार्थ स्वाःगु मदु, सुनां नं अज्याःगु द्वपं बिउगु नं मदु ।’

लिसें वय्कलं ललिता निवास व थज्याःगु कथंया मेगु प्रकरण नं याकनं क्वःजीमा धासें जनताया खि व गोबर म्हसीकेत अपुइकेमाःगु खँ नं धयादीगु दु । लिसें वय्ककं सुनां थःगु दाग त्वपुइत मेपिंत ध्याचः छ्वाकेगु ज्या मजुइमा धकाः नं धयादीगु दु ।