अनलाइनपाखें नां दर्ता याःपिंत जक खोप

येँ- सरकारं आवंलि अनलाइनपाखें नां दर्ता याःपिंत जक कोरोना विरुद्धया खोप बीगु जूगु दु । स्वास्थ्य तथा जनसंख्या मन्त्रालयं आवंलि येँ जिल्लाय् अनलाइनया माध्यमं नां दर्ता याःपिंत जक कोरोना विरुद्धया खोप बीगु प्रावधान दयेकूगु दु ।

मन्त्रालयया प्रावधानकथं आः अनलाइनय् नां दर्ता याःपिंत जक खोप बीगु येँ जिल्ला स्वास्थ्य ज्याकूया प्रमुख बद्रीबहादुर खड्काः कनादिल । मन्त्रालयं वंगु साउन १ गते उकथंया निर्देशन बिउगु खड्काः धयादीगु दु ।

सरकारं १८ दँ च्वय्यापिंत खोप बीगु धाःगु दु । खोप कायेत मन्त्रालयया वेबसाइटय् वनाः फारम जायेकाः नां दर्ता याये फइगु वय्कलं कनादिल । खोप केन्द्रय् खोप कायेत वइपिं हुलमुल जुइगुलिं उकथंया प्रावधान खःगु खः धकाः वय्कलं धयादिल ।