एमाले माओवादी एकता संकटय्

येँ – नेकपा (एमाले) व नेकपा (माओवादी) केन्द्रया एकता प्रक्रिया धरापय् लाइगु खतरा पिहां वःगु दु । सूत्रया कथं मछिंगु अवस्थाय् एमालें न्ह्याःगु खँयात नं स्वीकार याइगु व छिंगु अवस्थाय् उगु खँयात अस्वीकार यायेगु ज्या एमालें न्हापांगु संविधानसभाया चुनाव लिपा नं अज्याःगु नीति नालाच्वंगु खँ नं सूत्रं धाःगु दु ।

न्हापांगु संविधानसभाया चुनावय् थःपिं बहुमत मदयेवं एमालें १४ प्रदेशयात स्वीकार याःगु खःसा लिपा थःपिंत छिनेवं उगु प्रस्तावया विरोधय् न्ववायेगु ज्या शुरु याःगु खः । सूत्रया कथं माओवादी बल्लाःगु इलय् थःपिं क्वमिलु जुइगु व थःपिं सशक्त जुइवं थःपिं हावी जुइगु ज्या एमालें यानाच्वंगु दु ।
आः नं माओवादीं नाप सरकारय् दुसां नं गुलिखे ज्या माओवादीया मन्त्रीं तकं मसीक ज्या यानाच्वंगु दुसा थुगु खँ यानाः नं माओवादीया निगूगु पुस्तां यदि एमाले लिसें एकीकरण यायेगु खःसा सशस्त्र जनयुद्ध खँग्वःयात पार्टी संवोधन यायेमाःगु लिसें शक्ति बाँडफाँड नं बराबर जुइमाः धकाः प्रचण्डयात दबाब बियाच्वंगु खः ।

एमालेयात विश्वास याये मफयाः हे निगूगु पुस्तां थज्याःगु दबाब बियाच्वंगु खँ नं सूत्रं धाःगु दु । माओवादीया छुं छुं नेतात आः प्रचण्डयात स्वयां नं प्रधानमन्त्री केपी ओलीया पक्षया वनाच्वंगु खँ नं सूत्रं धाःगु दु । विशेष यानाः जनार्दन शर्मा लिसें संघीयताया विरोध याना वयाच्वंपिं माओवादीया नेतात आः प्रधानमन्त्री ओलीया पक्षय् वनाच्वंगु खँ सूत्रं धाःगु दु ।

यदि पार्टी एकताया झ्वलय् ६०-४० य् सहमति जुल धाःसां नं लिपा वनाः माओवादीया मू मू कार्यकर्तात प्रचण्डयात स्वयां ओलीयात विश्वास यानाः ओलीया पक्षय् वनीगु विश्लेषण पार्टी दुने हे जुयाच्वंगु खँ नं सूत्रं धाःगु दु ।

पार्र्टी एकता लिपा प्रधानमन्त्री ओलीं यकःति याये फइगु आशंका नं पार्टी दुने जुयाच्वंगु खँ धाःगु दु । एमालेया न्हापाया महासचिव झलनाथ खनालयात एमालें गुकथं ध्याकुनय् लाकूगु खः प्रचण्डयात नं बुलुहुँ ध्याकुनय् लाके फइगु आशंका नं पार्टी दुने जुयाच्वंगु दु । अथे जुयाः हे निगूगु पुस्ताया नेतात ५०-५० प्रतिशत हे पार्टी एकता यायेगु जक मखु उकिया अध्यक्ष नं प्रचण्डयात हे जुइमाः धकाः दबाब बियाच्वंगु खः ।

पार्टी एकीकरणया नामय् प्रधानमन्त्री ओलीं पार्टीया मेम्ह वरिष्ठ नेता माधवकुमार नेपालयात तकं थःगु फ्रेम दुने हयेधुंकूगु विश्लेषण नं माओवादीया निगूगु पुस्ताया नेतातय्सं यानाच्वंगु दु । अथे जूगुलिं पार्टी एकता धाःसां नं माओवादी एमालेय् दुहां वनेगु धइगु माओवादीया विलय थें जुइगु जुयाः आः छुं छुं निगूगु पुस्ताया नेतातय्सं प्रचण्डयात तप्यंकं हे पार्टी अध्यक्ष थःगु पार्टीयात माः धकाः दबाब बियाच्वंगु खँ नं सूत्रं धाःगु दु ।