ने. सं. ११४४ ञलाथ्व दशमी -

माक्व इन्जिनियर मदयाः विकासया ज्या ठप्प

येँ – येँ मनपाय् माक्व इन्जिनियर मदयाः वडा वडाय् जुइमाःगु विकास निर्माणया ज्या प्रभावित जूगु दु । येँ मनपा–१२ वडाया अध्यक्ष विकास डंगोलं थःगु वडाया चल्खु मार्गय् इन्जिनीयर मदयाः लँ दयेकेगु ज्या हे प्रभावित जूगु खँ कनादीगु दु । इन्जिनीयरं स्टिमेट मयायेकं विकासया ज्या न्ह्याः मवनीगु खँ कँसें वय्कलं छम्ह हे इन्जिनीयरं प्यंगू न्यागू वडा स्वयेमाःगु जुयाः सकभनं लाके मफयाच्वंगु जानकारी बियादिल ।वय्कःया कथं विकास निर्माण जक मखु स्थानीय जनताया छेँ दनगु ज्या तकं थुकिं यानाः प्रभावित जुयाच्वंगु दु ।

वय्कलं धयादिल, ‘छेँ दनेत इन्जिनीयर इलय् मवयाः समस्या जुयाच्वंगु दु, सेवाग्राहीं इलय् थःगु सेवा काये फयाच्वंगु मदु ।’येँया गुलिखे वडाय् थुगु दँया न्हापांगु चौमासिकय् यायेमाःगु खर्च तकं थीथी वडां याये मफयाच्वंगु खँ कँसें वय्कलं थःगु वडाय् वालय् छक्वः वइम्ह इन्जिनीयरयात छक्वलं प्यंगू न्यागू ज्या याकेगु यानाच्वनागु खँ कनादिल ।अथेहे २० वडाया वडाध्यक्ष राजेन्द्र मानन्धरं नं इन्जिनीयर मदयाः जनताया आकांक्षा कथं ज्या मजुयाच्वंगु खँ कनादीगु दु । चौमासिकया दुने गुलि ज्या जुइमाःगु खः उलि मजुयाच्वंगु खँ कँसें वय्कलं न्ह्यसः तयादी, ‘इन्जिनीयर टाइमय् वइगु मखु, अले गुकथं याकनं ज्या जुइ ?’

१९ वडाया वडाध्यक्ष शशीलाल श्रेष्ठं नं विकास निर्माणया ज्यां गति काये मफुगु खँ स्वीकार यानादीगु दु । वय्कलं न्ह्यःने धयादी, ‘ज्या ला जुयाच्वंगु दु, तर गति काये फयाच्वंगु मदु ।’१२ वडाया अध्यक्ष डंगोलं मनपाय् यक्व इन्जिनीयर दुसां पर्याप्त मजू, उकिं छगू वडाय् छम्ह इन्जिनीयर दयेमाःगु बिचाः तयादिल ।वय्कलं धयादी, ‘आः संघीय व्यवस्था लागू जुइत्यंगु दु, केन्द्रीय सरकारया इन्जिनीयरत नं स्थानीय निकायय् हयेगु खँ जुयाच्वंगु दु । उमित हये फत धाःसा समस्या म्हो जुइ ।’

थ्व समस्या बारे न्यनेत उपमेयर हरिप्रभा खड्गीयात स्वापू तयाबलय् वय्कलं प्रदेश सरकार गठन मजूगुलिं थप कर्मचारी भर्ना यायेत समस्या जुयाच्वंगु खँ कनादिल । प्रदेश सरकारं स्थानीय निकाययात माःगु कानून हयेधुंकाः जक कर्मचारी नियुक्ति याये फइगु जानकारी वय्कलं बियादिल । वय्कलं न्ह्यःने धयादी, ‘आः मनपायाके कर्मचारी भर्ना यायेगु अधिकार मदु । प्रदेश सरकार वयेधुंकाः जक थप कर्मचारी भर्ना यायेगु वा केन्द्रीय सरकारय् दुपिं कर्मचारीयात हे छ्वया हइगु खः । वयां लिपा जक थप निर्णय याये फइ ।’