नेपालं एमाले त्वःतूगु निष्कर्ष

येँ -नेकपा एमालेया अध्यक्ष लिसें पुलांम्ह प्रधानमन्त्री केपी शर्मा ओलीं आः पार्टीया वरिष्ठ नेता माधव नेपाल पार्टीइ लिहां मवइगु खँ धयादीगु दु । म्हिगः च्वंगु पार्टीया झिक्वःगु केन्द्रीय बैठकय् न्ववासें वय्कलं थ्व खँ धयादीगु खः ।

अध्यक्षं ओली प्रधानमन्त्री शेरबहादुर देउवायात विश्वासया मत बिउपिं पार्टीया २२ म्ह सांसदतय् पलाः लज्जास्पद जूगु खँ धासें पार्टीइ गुटबन्दीया नेतृत्व माधव नेपालं याःगु द्वपं नं बियादिल ।

वय्कलं आः बने जूगु सरकारं सत्ताया दुरुपयोग यानाः एमालेयात हमला यायेफु धासें उकिया सशक्त प्रतिवाद यायेमाःगु खँ नं कनादिल ।

वय्कलं धयादिल, ‘कांग्रेस न्हापांनिसें हे थम्हं आक्रमण यायेगु थम्हं मुद्दा तयेगु प्रवृत्तिया पार्टी खः, माओवादी शिथिल दु, मखुसा उगु पार्टी नं अपराध कर्मपाखे वंगु पार्टी खः, तर झीगु पार्टी जनताया अपार समर्थन दुगु पार्टी जूगुलिं सुनां नं पतिं धस्वाके फइमखु ।’

म्हिगः च्वंगु बैठकं फ्लोर क्रस यानाः प्रम देउवायात भोट बिउपिं २२ म्ह सांसदयात नीप्यघौया दुने स्पष्टीकरण न्यनेगु निर्णय नं याःगु दु । उकथं हे असार २७ गते कार्यदलं तयार याःगु झिगू बुँदाया सहमति कार्यान्वयन यायेगु निर्णय नं याःगु दु ।

म्हीग प्रधानमन्त्री देउवां विश्वासया मत काःगु इलय् माधव नेपाल पक्षया च्याम्ह सांसदतय्सं देउवायात मत मबिउगु खःसा ओली पक्षया मेपिं च्याम्ह सांसदतय्सं आकाझाकां फ्लोर क्रस यानाः देउवायात मत बिउगु खः । थ्व च्याम्ह सांसदतय्सं आः थःपिं नं माधव पक्षय् वनेधुनागु खँ धाःगु दु । उमिसं छुं न्हि न्ह्यवंनिसें हे देउवायात मत बीगु धकाः गोप्य रुपं खँ ब्याकाच्वंगु खः ।

सम्बन्धित बुखँ

LEAVE YOUR COMMENTS