ने. सं. ११४४ चौलागा पुन्हि - ल्हुति पुन्हि

सुनागूया स्थानीयत विरोध प्रदर्शनय्

येँ (नेपालभाषा टाइम्स) – यल महानगरपालिका अन्तर्गतया सुनागू लागाय ताःईतकं सतक निर्माणया ज्या मयाःगु धासें स्थानीयतय्सं विरोध प्रदर्शन याःगु दु । यल मनपा वडा नं. २७ अन्तर्गतया सुनागुथिइ ताःईतक नं सतक कालोपत्र यायेगु ज्या मजूगु धासें स्थानीयत विरोधय् कुहां वःगु खः ।

सुनागू लागाया स्थानीयत सतक कालोपत्र यायेमाःगु माग यासें वंगु छुं दिं न्ह्यवंनिसें आन्दोलनय् कुहां वयाच्वंगु दु। आन्दोलनय् कुहां वयाच्वंपिं स्थानीयत लँ हे बन्द यानाः आन्दोलनय् कुहां वयाच्वंगु खः । सतक कालोपत्र जुइ धइगु आसं च्वनाच्वंपिं स्थानीयत कालोपत्र यायेगु ज्या मजूगुलिं धू नया च्वनेमाःगु अवस्था दु । थुकथं धू नयाः विरामी जुइगु अवस्थाय् तक थःपिं थ्यनेधुंकूगु स्थानीतय्सं धाःगु दु । सतक कालोपत्र यायेगु ज्या मजूगु धासें विरोधय् कुहां वयाच्वंपिं स्थानीयत तसकं तम्वया च्वंगु दु। इमिसं विकास निर्माणया ज्याय् पंगः थनीपिंत राजनीतिक दल व नेतातय्सं हे संरक्षण यानाच्वंगुलिं थुकथंया समस्या जुयाच्वंगु व सास्ति धाःसा थःपिंसं नयाच्वनेमाःगु स्थानीयतय्सं धाःगु दु ।

सुनागू लागाया ८ मिटर सतकयात २२ मिटर तक तब्या यायेगु निंतिं सम्झौता नं जुइधुंकूगु दु । सडक विभाग व ठेकेदार कम्पनी दथुइ सतक २२ मिटर तब्या यायेगु सम्ताझौ जूगु खः । सतक मर्मत यानाः कालोपत्र यायेत स्थानीयतय्सं तःक्वः तःक्वः ताकेता याःसां नं ज्या धाःसा जुयाच्वंगु मदु । थःपिंसं तःक्वः हे सतक कालोपत्र यायेत इनाप यानागु खःसां उकियात बेवास्ता यायेगु ज्या जुयाच्वंगु व विरोधय् कुहां वःसां नं ज्या यायेगुपाखें सम्बन्धित सरोकारवाला निकायं ध्यान बियामच्वंगु स्थानीयतय् धापू दु ।