जनबहाःद्यःया खः यंकेमाःगु लँपुइ डोजरं गाः म्हुया हल
येँ (नेपालभाषा टाइम्स)÷न्ह्यःने वयाच्वंगु जनबहाःद्यःया जात्रायात ध्यानय् तयाः जात्रा जुइगु लँपुइ छुं नं कथंया निर्माणया ज्या याये मते धकाः जनबहाःद्यः जात्रा व्यवस्थापन समितिं इनाप याःसां नं थनया भ्याय्चाद्यः, थाय्मरु त्वालय् धाःसा थ्वहे इलय् धःया पाइप लायेगु लागिं ततःत्याःगु ह्युम पाइप हयाः तये हःगु दु ।
म्हीगंनिसें भ्याय्चाद्यः लागाय् डोजर हयाः गाः म्हुइगु ज्या नं शुरु याःगु दु । अन डोजरं गाः म्हुयाः पाइप तयेगु ज्या यायेत्यंगु खः । गाः म्हुयाः पाइप तयेगु लागिं थाय्मरु त्वालय् लँया दथुइ हे सतक पंक ह्युम हयाः तये हःगु दु । थ्व रुट धइगु जनबहाःद्यः रथय् तइ कुन्हु द्यःयात खतय् तयाः कुबिया यंकीगु लागा खः । आः डोजरं गाः म्हुयाः अन पाइप लायेगु ज्या क्वचाःसां नं बांलाक चा ल्हाके मफइगु जूगुलिं द्यः जात्रा यानाः हइबलय् वयेत थाकुइफु धाःगु दु ।
द्यः रथय् बिज्याकेत यंकीबलय् नापं वयेमाःपिं गुलिखे गुर्जुपिं ह्विलचेयरय् समेत तयाः हयेमाःगु अवस्था दु । वय्कःपिंत थ्व स्यंगु लँ जुयाः हयेत थाकुइफु धाःगु दु । जात्रा न्ह्यःने थज्याःगु समस्या वइ धकाः हे जात्रा व्यवस्थापन समितिं जात्रा न्ह्यः रुटय् लाःगु लँय् छुं नं कथंया निर्माणया ज्या याना बी मते धकाः इनाप याःगु खः ।
LEAVE YOUR COMMENTS