आः राष्ट्रपति विरुद्ध महाभियोग तयेमाःगु माग

येँ -सर्वोच्च अदालतं म्हिगः याःगु फैसला लिपा आः राष्ट्रपति विद्यादेवी भण्डारीया ज्याखँ नं चर्चाया विषय जूगु दु । राष्ट्रपति भण्डारीं याःगु ज्यायात समेत सर्वोच्चं खारेज याना बिउगु कारणं वय्कः संविधानया रक्षक मखु धइगु प्रमाणित जूगु दु । उकिं आः राष्ट्रपति भण्डारीं नं नैतिकताया आधारय् राजीनामा बीमाःगु सः थ्वया वःगु दु ।

छुं जुयाः राष्ट्रपतिं राजीनामा मबिल धाःसा वय्कःया विरुद्ध महाभियोग तये माःगु माग नं जुया वःगु दु । भण्डारीं प्रधानमन्त्री ओलीं छु धाल अज्याःगु हे जक ज्या यानाच्वंगु जुयाः आः वय्कःयात महाभियोग तयाः जूसां चीकेमाःगु सः नं थ्वया वःगु खः ।

राजनीतिक पार्टीतय्सं धाःसा आः तक राष्ट्रपतिया बारे छुं न्ववाःगु मदुनि । राष्ट्रपति भण्डारीं चांचां ओलीया प्रस्ताव वयाखतं हे संसद भंग यानादीगु कारणं वय्कःया भूमिका विवादय् लाःगु खः ।

संसद पुनस्र्थापना जुयाः प्रधानमन्त्री पद त्वःते मालीगु जुइवं आः केपी शर्मा ओलीया राजनीतिक भविष्य नं अनिश्चित जूवंगु खँ धयाहःगु दु । लिपांगु इलय् ओली पद नं त्वःतेमाःगु व माधव नेपाल पुचःयात यानातःगु कारवाही नं लित कायेमाःगु दोहोरो घाटाया अवस्थाय् थ्यंगु खः । प्रधानमन्त्री मखयेसातकि आः पार्टी दुने नं वय्कःया पकड कमजोर जू वनीगु अनुमान याना हःगु दु ।

उकथं हे ओलीलिसे गठबन्धन याःवंपिं जसपाया अध्यक्ष महन्थ ठाकुर व वय्कःया पुचःयात नं तःधंगु राजनीतिक धक्का लाःगु खँ धाःगु दु ।