महरायात ज्वन, म्होतिं नं २८ गते तक हिरासतय्

येँ – बलात्कार द्वपनय् सभामुख पदं राजीनामा बिउम्ह पुलांम्ह सभामुख कृष्णबहादुर महरायात प्रहरीं ज्वंगु दु । प्रहरीं आइतवाः सनिलय् बालुवाटारय् च्वंगु सभामुख निवासं हे ज्वना यंकूगु खः । ह्याउँगु कारय् च्वनावःपिं सादा पोशाकया प्रहरीं महरायात ज्वनायंकूगु खः । महरां हे थःत प्रहरी भ्यानय् मयंकुसे निजी कारय् यंकेत माग याःगुलिं निजी कारय् तयायंकूगु खँ धाःगु दु ।

महरायात ज्वने न्ह्यः प्रहरीं जिल्ला अदालतपाखें स्वीकृति कयाहःगु खः । आइतवाः सुथय् जिल्ला अदालत काठमाडौंया न्यायाधीश ब्रजेश प्याकुरेलं महरायात ज्वनाः अनुसन्धान न्ह्याकेत अनुमति बिउगु खः । आइतवाः ज्वना यंकूम्ह महरा आः म्होतिं नं २८ गते मंगलवाः तक प्रहरी हिरासतय् लाइगु जूगु दु । २८ गते जक अदालत चालीगु जूगुलिं महराया जमानत हे जूसां उबलय् अदालतय् बहस लिपा जक जुइफइगु खँ धाःगु दु । महरायात आः महानगरीय प्रहरी वृत्त सिंहदरबारय् यंकूगु दु ।

महरायात बलात्कारया द्वपं बिउम्ह रोशनी शाही म्हिगः शनिवाः प्रहरीइ लिखित उजुरी बिइवं महरायात ज्वनेगु ज्या जूगु खः । म्हिगः लिखित उजुरी लायेवं आइतवाः अदालत चालेवं जिल्ला अदालतय् महरायात ज्वनेगु निंतिं अनुमति काःगु खः ।

सभामुख जुयाच्वंम्ह महरां वंगु असोज १२ गते सनिलय् संसदया मिसा कर्मचारी रोशनी शाहीया छेँय् हे वनाः बलात्कार यायेगु कुतः याःगु खः । थःत बलात्कार यायेगु कुतः जुइवं शाहीं उकुन्हु हे प्रहरी सःताः थःत महरां बलात्कार यायेगु कुतः याःगु व दाया थकूगु बयान बिउगु खः । शाहीं उबलय् हे नेकपा व कंग्रेसया मिसा सांसद, महराया कायपिंत म्यासेज छ्वयाः थःत बलात्कार यायेगु कुतः जूगु जानकारी बिउगु खः ।

महरायात थ्व द्वपं लायेवं नेकपा अध्यक्ष व प्रधानमन्त्री केपी ओली, अध्यक्ष पुष्पकमल दाहाल व नेता माधव नेपालपिंसं सभामुख पदं राजीनामा बीत दबाब बिउगु खः ।

सम्बन्धित बुखँ

LEAVE YOUR COMMENTS