ने. सं. ११४४ कौलाथ्व पारू - नःलास्वनेगु

आः पलायन अपराधीपाखे मिखा

येँ – नेपालय् अपराध यानाः विदेशय् बिसिउँ वनाच्वंपिं अपराधीतय्त नेपाः लित हयेगु निंतिं प्रहरीं कुतः तच्वयेकाहःगु दु । फौजदारी अभियोग लानाच्वंपिंत नेपाः लित हयेगु निंतिं प्रहरीं आः धमाधम इन्टरपोलय् रेडकर्नर नोटिस बीगुनिसें सुचं कालबिल तच्वयेकाहःगु दु । प्रहरीं वंगु खुदँ दुने जक रेडकर्नर नोटिस जारी यानाः व सुचं कालबिल यानाः थीथी देशं २२ म्ह अपराधीतय्त नेपाः हयेधुंकूगु दु ।

छुं न्हि न्ह्यः जक बलात्कारया मुद्दाय् दोषी ठहर जुयाच्वंम्ह छम्ह मिजंयात १९ दँ लिपा अमेरिकां नेपाः लित हःगु खः । नेपालय् बलात्कार यानाः बिसिउँ वनाः अमेरिकाय् च्वनाच्वंगु जानकारी १९ दँ लिपा प्रहरीयात वयेवं प्रहरीं इन्टरपोललिसेया सहकार्यय् वयात नेपाः हःगु खः ।
नेपाःया भारतलिसे जक सुपुर्दगी सन्धि दु, उकिं थज्याःपिं अपराधीत नेपाः हयेबलय् औपचारिक रुपं धाःसा हये फयाच्वंगु मदु ।

थुकिया निंतिं रेडकर्नर नोटिस व सुचं कालबिल जुइधुंकाः बिसिउँ वनाच्वंगु देय्या प्रहरीं ज्वनाः नेपाः वइगु जहाजय् तया बीगु याइ, अले नेपाःया प्रहरीयात सुचं बी । प्रहरीं एयरपोर्टय् वनाः उम्ह मनूयात ज्वनी । सन् २०१९ य् जक नेपालं रेडकर्नर नोटिस तःपिं मध्ये प्यम्हेसित ज्वनाः नेपाः हयेधुंकूगु दु ।

आःतक नेपालं ८७ म्हेसिया निंतिं रेडकर्नर नोटिस जारी याःगु दुसा ७२ म्हेसित मालेगु निंतिं सुचं बियातःगु दु । नेपालं बिसिउँ वनाच्वंपिं अप्वः अपराधीत बलात्कार, हत्या, अपहरण, मानव बेचविखन व ठगी मुद्दा लानाच्वंगु खः । नेपाल प्रहरीया प्रवक्ता डिआइजी विश्वराज पोखरेलं थज्याःपिं अभियुक्ततय्त ज्वनेगु निंतिं इन्टरपोलया दुजः देय्त लिसे निरन्तर सम्पर्कय् च्वनाच्वनागु खँ धयादीगु दु ।