तःधंगु दलतय्त ‘थ्रेट’ महसुस

असार लछि सिनाज्याय् ग्वाहालि याः वनेगु कांग्रेसया नीति

येँ (नेपालभाषा टाइम्स)÷लिपा अस्तित्वय् वःगु न्हून्हूगु पार्टीतय्सं लिपांगु इलय् न्हियान्हिथं प्रभावकारी ज्या याना हयेवं नेपाली कांग्रेस, एमाले थेंज्याःगु पार्टीतय्सं ‘थे्रट’ महसुस याना हःगु दु । थ्वहे खँयात थुइकाः आः कांग्रेसं थः कार्यकर्तातय्त व्यापक रुपं परिचालन यानाः शक्ति विस्तार यायेगु नीति ज्वंगु दु ।

नकतिनि च्वंगु कांग्रेसया पदाधिकारी बैठकं थ्व निर्णय याःगु खः । थ्व नीति कथं आः कांग्रेसं हरेक वर्षया असार महिना लछि पार्टीया सदस्यतय्सं गांगामय् वनाः स्थानीय जनतायाया सिनाज्याय् ग्वाहालि यायेमाःगु नीति दयेकूगु दु । थ्वहे इलय् जनतायात ग्वाहालि याइपिं मनूतय् खाँचो जुयाच्वनीगु कारणं उमित वनाः ग्वाहालि यायेगु नीति दयेकूगु खः ।

अथे हे आः पार्टीया केन्द्रीय दुजः–तय्सं नं दँय् लछि जक बिदा काये दइगु व बाँकी ई कार्यक्षेत्रय् खटे जुइ हे माःगु कार्यक्रम नं दयेकूगु दु । हरेक केन्द्रीय दुजः छुं न छुं विभागय् दइगु व उमिसं नियमित रुपं थःगु विभागया ज्या यानाच्वंगु दये हे माःगु नीति दयेकूगु दु ।

आः वइगु भदौ १५ गते तकया दुने फुक्क हे विभाग पुनर्गठन यायेगु व उकी जिम्मा काःपिंसं अनिवार्य ज्या याये माःगु नीति कासें आः वइगु दछिया दुने ७ लाख न्हूपिं कार्यकर्ता दयेकेगु लक्ष्य नं कांग्रेसं दयेकूगु दु ।

एमालें ‘छम्ह व्यक्ति छगू पद’ कडा रुपं लागू याइगु

वंगु आम चुनाव लिपा तःधंगु पार्टी जुइगु म्हगस चकनाचुर जूगु जक मखु सत्ताय् वनेगु अवसरं नं बञ्चित जुइमाःगु कारणं एमाले दुने नं विचलन पिहां वःगु खँ धाःगु दु । लिसें न्हू वःगु पार्टीतय्सं धमाधम चुनाव त्याकाः थःपिंसं हाथ्या बिया हःगु महसुस यासें एमालें नं कार्यकर्ता पंक्तियात बल्लाका यंकेगु नीति ज्वंगु दु ।

थुकिया लागिं छुं ई न्ह्यः जक एमालें मिसन ग्रासरुट धकाः अभियान न्ह्याकूगु खःसा आः हानं मेगु मिसन न्ह्याकेगु तयारी यानाच्वंगु दु । मिसन ग्रास रुट खास हे प्रभावकारी मजूगु विश्लेषण यासें एमालें आः थीथी निकायया पदय् दुपिं कार्यकर्तातय्सं पार्टीया पदीय जिम्मेवारी त्वःतेमाःगु नियम लागू यायेत्यंगु दु ।

छम्ह हे मनू पार्टीया पदीय जिम्मेवारीइ नं दुगु व थीथी राजनीतिक पदय् नं दुबलय् उमिसं पार्टी दुने प्रभावकारी भूमिका म्हिते मफुगु धासें थीथी स्थानीय तहया पदय् मेयर, उपमेयर, अध्यक्ष, उपाध्यक्ष व वडाध्यक्ष जुयाच्वंपिंसं पार्टीया पद त्वःताः ‘छम्ह व्यक्ति छगू पद’ नीति ज्वनेत्यंगु खः ।

थ्व नीति पार्टी अध्यक्ष केपी ओली छम्हेसित धाःसा लागू मजुइगु खँ धाःगु दु । पार्टीया जिम्मेवारी दुपिंत आः पूवंक हे पार्टीया ज्याय् खटे यायेगु रणनीति कथं एमालें थ्व नीति ज्वंगु खँ धाःगु दु ।

सम्बन्धित बुखँ

LEAVE YOUR COMMENTS