ने. सं. ११४६ बछलागा नवमी -

किपू बाघभैरव दर्शनया निंतिं खुल्ला

किपू- किपू नगरपालिका वडा नं. १ य् च्वंगु बाघभैरव देगः सर्वसाधारणया निंतिं खुल्ला याःगु दु । कोरोना भाइरस (कोभिड १९)या निगूगु लहरया संक्रमण रोकथाम व नियन्त्रणया निंतिं निषेधाज्ञाया कारणं देगः बन्द यानातःगु खः ।

नेपाल सरकारं वंगु बैशाख १६ गतेनिसें जारी याःगु निषेधाज्ञाया इलंनिसें सर्वसाधारणयात दर्शनया निंतिं बन्द यानातःगु बाघभैरव देगः वंगु विहीवाःनिसें खुल्ला याःगु खः ।
निषेधाज्ञाया हे दथुइ किपूतय्सं आराध्य द्यःकथं माने यानावयाच्वंगु देगःया आँय्पा पौ लिकयाः सिजःया पौ छुइगु ज्या जूगु खः । झण्डै निलाः मल्याक देगः बन्द जूगुलिं द्यःया दर्शन याये मखनाच्वंपिं स्थानीयत देगः चालेवं आपालं किपूत द्यःया दर्शन यायेत वःगु खः ।