अर्जेन्टिना व चिली कोपा अमेरिकाया क्वाटरफाइनलय्

एजेन्सी- अर्जेन्टिना व चिली कोपा अमेरिकाया क्वाटरफाइनलय् थ्यंगु दु । मंगलवाः सुथय् समुह ए या कासाय् अर्जेन्टिनां पाराग्वेयात बुकाः क्वाटरफाइनलय् थाय् दयेकूगु खःसा चिलीं उरुग्वेयात बराबरी पनाः क्वाटरफाइनलय् थाय् दयेकूगु खः ।

अर्जेन्टिनां संघर्षपूर्ण कासाय् पाराग्वेयात १–० गोलं बुकूगु खः । अर्जेन्टिनाया निंतिं कासाया छगू जक गोल एलेजेन्ड्रो गोमेजं कासाया झिगूगु मिनेटय् याःगु खः । थ्व कासा म्हिताः कप्तान लियोनल मेसीं अर्जेन्टिनाया निंतिं दकलय् अप्व कासा म्हितूम्ह अर्जेन्टिनी कासामि जेभिर मास्चिरानोया १४७ गू कासा म्हितूगु कीर्तिमानया बराबरी याःगु दु ।

मंगलवाः हे जूगु मेगु कासाय् चिलीं उरुग्वेलिसे छगू छगू गोलया बराबरी म्हितूगु खः । कासा बराबरी जूसा चिलीं क्वाटरफाइनलय् थ्यंगु दु । कासाय् चिलीया निंतिं २६ औं मिनेटय् भर्गासं गोल याःगु खः। कासााया मेगु गोल धाःसा आत्मघाती जुल । कासाया ६६ मिनेटय् भिडालं आत्मघाती गोल यायेवं उरुग्वें कासां बराबरी हःगु खः ।

समुह ए लय् अर्जेन्टिना शीर्ष थासय् दु । निगूगु थासय् चिली, स्वंगूगु थासय् पाराग्वे, प्यंगूगु थासय् उरुग्वे व अन्तिमय् बोलिभिया दु ।