यलया महानगरया लँय् ज्वज्वलपा, नमस्कार

यल- यल महानगरपालिकाया सतकय् थीथी थासय् ततःग्वःगु ल्वहंतय् सन्देशमूलक आखः च्वयाः छाय्पीगु ज्या जूगु दु । महानगरया सतकय् थीथी थासय् ट्राफिक सचेतना सम्बन्धी सन्देश च्वयेगु ज्या जूग खः ।

यल महानगरपालिकां कोरोना पनेत निषेधाज्ञा तयातःगु व सतक व्यस्त मजुइगु ईया सदुपयोग यासें उकथं सतकय् ट्राफिक सचेतना सम्बन्धी सचेतनामूलक खँग्वःत च्वयाः सतकयात आकर्षक दयेकेगु ज्या याःगु खः ।

यल महानगरपालिका प्रमुख चिरिबाबु महर्जनं सतकया न्ह्यःने लाःथाय् लाक्वपाक्व धंगं वांछ्वयातःगु फोहर मुनेगु व यल देय्यात आकर्षक खने दयेकेगु ल्याखं सतकया दथुइ च्वंगु ग्रीनवेल्टय् ततःग्वःगु ल्वहंतय् उकथं सचेतना सम्बन्धी सन्देशमूलक आखः च्वयेगु ज्या जूगु जानकारी बियादिल ।

सवारी चालक व लँजुवाःतय् निंतिं ट्राफिक सचेतना ब्वलंकेकथं सन्देशमूलक खँग्वः, खँपुत च्वयेगु ज्या जूगु जानकारी यल महानगरीय प्रहरी प्रमुख सिताराम हाछेथुं कनादिल । वय्कःया कथं महानगर दुनेया करिब २०० स्वयां अप्वः ल्वहंतय् उकथंया खँग्वः च्वयेगु ज्या जूगु दु । यल महानगरया सतकय् च्वंगु ग्रीनबेल्टय् च्वंगु ल्वहंतय् ‘नमस्कार ज्वज्वलपा’, ‘बिस्तारै जानुस’, ‘सुरक्षित यात्रा गरौं’, ‘सुरक्षित रुपमा बाटो काटौं’ थेंज्याःगु सन्देशमूलक खँग्वःत च्वयातःगु दु ।