सिन्धुपाल्चोकय् निःशुल्क स्वास्थ्य शिविर

येँ- सिन्धुपाल्चोक जिल्लाया इन्द्रावती गाउँपालिकाय् निःशुल्क स्वास्थ्य शिविर संचालन जूगु दु । येँय् नं लिक्क लाःगु जिल्लाया उगु गाउँपालिकाया स्थानीय जनसमुदाययात लक्षित यानाः संचालन जूगु स्वास्थ्य शिविरय् हाड जोर्नी, मिसा ल्वय्, मचा ल्वय्, छाति, गंल्वय्, वा, ब्लड प्रेसर, चिनी ल्वय्, मचाछेँया अपरेसन नापं सामान्य ल्वय्या परीक्षण याःगु खः ।

निःशुल्क स्वास्थ्य शिविरय् मिसा, मिजं व मस्त यानाः १,१३२ म्हेसिया थीथी ल्वय्या परीक्षण याःगु खः । स्वास्थ्य परीक्षण जूपिंमध्ये खुम्ह मिसाया मचाछेँया अपरेसन यायेमाःगु खने दुगुलिं इमिगु अपरेशनया निंतिं ख्वप अस्पतालं ग्वाहालि यायेगु अस्पतालया सुपरिटेन्डेन्ट डा. सुधा शर्मां कनादिल ।

नेपाल रेडक्रस सोसाइटी सिन्धुपाल्चोक शाखाया सभापति राजेन्द्रमान ताल्चाभडेलया सहभापतित्वय् जूगु शिविरया उलेज्या इन्द्रावती गाउँपालिकाया प्रमुख वंशगोपाल तामांगं यानादीगु खः ।

२०७२ साल बैशाख १२ गतेया विनाशकारी भुखाचय् लानाः पीडित जूपिं नवलपुरया जनसमुदाययात थ्व स्वयां न्ह्यः राहत व वासः इनेगुनिसें मेमेगु नं सेवा बिया वयाच्वंगु खःसा थुगुसी धाःसा स्वास्थ्य शिविर संचालनलिसें सितिकं वासः इनेगु ज्या जूगु वरिष्ठ समाजसेवी वासुदेवप्रसाद जोशी स्मृति प्रतिष्ठानया अध्यक्ष शरण जोशीं जानकारी बियादिल ।

उगु शिविर इन्द्रवती गाउ“पालिका नवलपुर, नवलपुर स्वास्थ्य चौकी, नवलपुर माध्यमिक विद्यालय, नौली महादेव महिला साकोस, नेरेसो, सिन्धुपाल्चोक शाखा, बासुदेवप्रसाद जोशी स्मृति प्रतिष्ठान, नेपाल क्षयरोग निवारण संस्था भक्तपुर, पिन नेपाल, लायन्स क्लव अफ काठमाडौं सुप्रान, तारा मण्डल महिला शसक्तिकरण अभियान, खुड्किलो नेपाल व माता मनकामना स्क्रीन प्रिण्ट उद्योगया मंकाः ग्वसालय् जूगु खः ।