लालीगुराँस सहकारीया न्ह्यःनेया लँ बन्द याइगु

यल-  यलया ऐतिहासिक समय फल्चा दयेकेगु निंतिं ताःई न्ह्यवनिसें पंगः थनाच्वंगु लालीगुराँस बहुउद्देश्यीय सहकारीया भवनया न्ह्यःनेया लँ पूवंके हे बन्द यानाबीगु जूगु दु । सहकारी भवन दयेकूबलय्या नक्साय् न्ह्यःने लँ मदुगुलिं आः उगु लँ पूवंके हे बन्द यानाबीत्यंगु खः ।

सहकारीं थ्व फल्चा दयेकलकि थःपिनिगु भवनयात पनीगु धासें तःदँ न्ह्यवनिसें थीथी अदालतय् मुद्दा तयाः ऐतिहासिक फल्चा दयेकेमबीगु कुतः यानाच्वंगु खः । सहकारी पाखें फल्चा दयेकेगु पनेगु निंतिं निवाः न्ह्यः उच्च अदालतय् तःगु मुद्दाय् नं उच्च अदालतं पुनर्निर्माण दिकेम्वाःगु फैसला न्यंकेगु सोमवाः सुथय् निसें हाकनं दयेकेगु सुरु जूगु खः ।

सोमवाः ज्या सुरु यायेत्यंबलय् नं सहकारी पाखें पंगः थनेत स्वयेवं स्थानीयतय्सं हाःहू यानाः दयेकेगु सुरु याःगु खः । थ्यंमथ्यं १०६ दँ न्ह्यः हे दुगु थुगु फल्चा दयेकेत पंगः थनाच्वंगुलिं स्थानीयत सहकारी खनाः तम्वयाच्वंगु खः । सोमवाः फल्चा दयेकेगु झ्वलय् भवनया न्ह्यःनेया लँ बन्द यानाः छचाःलिं जस्ता ग्वयाबिउगु खः । थ्व झ्वलय् सहकारी भवनया नक्साय् न्ह्यःनेया लँ हे मदुगु नक्सा न्ह्यब्वयाः उगु लँ बन्द जूगु सुचंया ब्यानर हे तयाबिउगु खः ।

आः सहकारीं लिउनेया लँ दयेकेत छवाःया ई फ्वंगुलिं भवन दुहां वनेगु न्ह्यःनेया लुखाया वनेगु लँ छकूचा धाःसा चायेकाबिउगु दु । सहकारीं लिउनेया लँ मदयेकूतलेया निंतिं न्ह्यःनेया लँ बन्द मयायेत इनाप याःगुलिं न्हय्न्हुया निंतिं लँ चायेका बिउगु खँ सीदुगु दु ।

सम्बन्धित बुखँ

LEAVE YOUR COMMENTS