ख्वह्रंया न्याताँ उलेज्या

ख्वप(नेपालभाषा टाइम्स)- ख्वप नगरपालिका वडा नं. ७ ख्वह्रं (हनुमानघाट)य् निर्माण सम्पन्न जूगु न्याताँया उलेज्या याःगु दु । ख्वप नगरपालिकाया प्रमुख सुनिल प्रजापतिं छज्वः बखुं ब्वयेकाः ताँया उलेज्या यानादीगु खः ।

नगर प्रमुख प्रजापतिं ताँया उलेज्या यासें जनताया सम्पत्ति जनताया हे सहभागिताय् दयेकेगु नगरपालिकाया नीतिकथं हे ताँ निर्माण जूगु खः धयादिल । वय्कलं नगरपालिकां जनताया आर्थिक व भौतिक ग्वाहालि व श्रमदान चूलाकाः विकास निर्माणया ज्या जुयाच्वंगु व आपालं ज्या उपभोक्ता समितिपाखें हे जुयाच्वंगु जानकारी बियादीगु दु ।

उपप्रमुख रजनी जोशीं नवनिर्मित तां हनुमानघाटया सुन्दरता व स्वरुपय् हिउपाः वःगु चर्चा यानादिल । ख्वपय् उपभोक्ता मोडल सफल जूगुलिइ समितिइ च्वनाः ज्या यानादीपिं पदाधिकारीतय् तःधंगु भूमिका व योगदानया कारणं खः धयादिल ।

वडाअध्यक्ष उकेश कवां ताँ दयेकेगु ज्याय् ग्वाहालि यानादीपिंत सुभाय् देछानादिसें पुर्खां तसकं मेहनत यानाः दयेकूगु ताँ जिर्णोद्वारय् स्थानीयपाखें आपालं ग्वाहालि दुगु खँ कनादिल । ज्याझ्वलय् ताँ जिर्णोद्वार समितिया अध्यक्ष कृष्णगोविन्द खाइजुं आय व्यय विवरण न्ह्यब्वयादीगु खः । उगु ताँ ख्वप नगरपालिकाया ४१ गू लख स्वीस्वद्वः लागतय् निर्माण जूगु खः ।