थौं इंग्ल्यान्ड, जापान व सेनेगलया कासा

एजेन्सी- विश्वकपया समूह जी अन्तर्गत थौं इंग्ल्यान्डं पानामाया सामना यायेत्यंगु दु । न्हापांगु कासाय् ह्यारि केनया निगू गोलया ग्वाहािलं ट्युनिसियायात बुकाः वःगु इंग्ल्यान्डं पानामायात नं बुकाः याउँक निगूगु चरणय् दुहां वनेगु स्वइ जुइ । मेखे बेल्जियम नाप पराजित जूगु कासाय् न्यागू म्हासुगु कार्ड नयावःगु पानामां धाःसा थौं नं इंग्ल्यान्ड विरुद्ध थज्याःगु हे रफ कासा म्हितफुगु अनुमान यानातःगु दु ।

पानामां थज्याःगु रफ कासा म्हितल धाःसा वयागु शिकार केन हे जुइफु । प्रिमियर लिगय् उत्कृष्ट कासा म्हिताः थुगु सिजनय् दकलय् अप्वः गोल याःम्ह निम्हम्ह कासामि जुयाच्वंम्ह केन हे इंग्ल्यान्डया मू हतियार जुयाच्वंगु दु । ट्युनिसिया विरुद्ध निगू गोल यानाः केनं थःत प्रमाणित नं यायेधुंकूगु दु ।

थौं हे समूह एच पाखें जापानं सेनेगलया व पोल्यान्डं कोलम्बियाया सामना याइगु जुइ । थ्व समूह जापान व सेनेगल निगुलिं थःथःपिनिगु न्हापांगु कासा त्याकाः निगूगु चरणय् वनेगु निंतिं छपलाः न्ह्यःने लानाच्वने धुंकूगु दु । थ्व निगुलिं टिमं थौं थः प्रतिद्वन्द्वीयात बुकल धाःसा याउँक हे निगूगु चरणय् वनीगु जुइ । मेखे कोलम्बिया व पोल्यान्डं धाःसा थःपिंत धेंधेंबल्लाखय् ल्यंकातयेगु खःसा थौंया कासा त्याके हे माःगु अवस्थाय् दु । न्हापांगु कासाय् पराजित जूगुलिं थुपिं निगुलिं टिम दबाबय् दु । थ्व कासा बुत धाःसा निगुलिं टिम छेँय् लिहां वनीगु जुइ ।