मेलम्चीइ राहत इनेथाय् पक्षपात

येँ -थुगुसी वःगु खुसिबालं आपालं जनधनया क्षति जूगु मेलम्ची क्षेत्रय् आः प्राकृतिक विपत्ति लिपा राजनीतिक व स्थानीय कचवं नं पिहां वःगु दु । खास यानाः खुसिबालं पीडित जूपिं स्थानीयवासीयात राहत इनेगु ज्याय् राजनीति जुल धकाः विवाद जूगु दु । शुक्रवाः मेलम्चीया स्थानीय इन्द्रेश्वर माविइ राहत इनेगु ज्या जूथाय् एमाले समर्थित अनेरास्ववियुया ब्यानर ब्वये हल धकाः ल्वापु जुल । ल्वापुं यानाः अन राहत इनेगु ज्या तकं स्थगित यायेमाःगु खः ।

अन थीथी निकायपाखें मुंकाहःगु राहत एकद्वार प्रणालीपाखें इनेगु धकाः तयारी जूगु खःसा अन अनेरास्ववियुया ब्यानर खनेवं मेगु पार्टीया कार्यकर्तां उकिया विरोध याःगु खः । राहत इनेगु खँय् ल्वापु जूबलय् अन राहत सामग्री बियाहःपिं छुं दातात नं न्ह्यःने हे दुगु खः । थःपिंसं बीत्यनागु राहतयात कयाः राजनीतिक कार्यकर्तातय्सं विवाद याःगु खनाः थःपिंत दुःख जूगु खँ उमिसं धाःगु दु । ल्वापु जुयाः राहत इने मफुसेंलि तुरुन्त मेगु ब्यानर तयाः तिनि इनेगु ज्या जूगु खः । ल्वापु पनेत प्रहरीं हस्तक्षेप यायेमाःगु खः ।

मेखे पीडितया नामय् राहत इनेगु ज्या फुक्क मेलम्चीइ जक जुयाच्वन धाःसा मेगु क्षतिग्रस्त लागा हेलम्बु गाउँपालिकाया पीडित जनतां दुःख प्वंकूगु दु । थःपिं थौंकन्हय् नये मखनाच्वंगु दुसां राहत इनीपिं दातात व सरकारी निकायत खालि मेलम्ची बजारय् च्वनाः बजारय् च्वंपिंत जक राहत बियाच्वन धकाः उमिसं दुःख प्वंकूगु दु । राहत इनेगु व क्षतिया विवरण कायेगु ज्या तकं मेलम्ची बजारय् बैठक च्वनाः तयार यानाच्वन धकाः नं गाउँपालिका अध्यक्ष निमा ग्याल्जिन लामां द्वपं बियादीगु दु । राहत इनेगु ज्याय् पक्षपात यात धकाः च्वय् गामय् च्वंपिं पीडित जनतां नुगलय् स्याकाच्वंगु खँ नं अध्यक्ष लामां कनादिल ।

पीडितपिंत राहत बीगु धकाः थौंकन्हय् मेलम्ची भीड जुइक मनूत वयाच्वंगु खँ सिन्धुपाल्चोकया सिडिओ अरुण पोखरेलं धयादीगु दु । थौंकन्हय् अन न्हिछिया स्वद्वलं मल्याक युट्युबर, पत्रकार, राहत बीपिं वयाच्वंगुलिं स्थानीय पीडिततय्त झन जक सास्ती जुयाच्वंगु खँ धाःगु दु । युट्युबरतय्सं घेरे यानाः न्यने कने यानाच्वंगुलिं पीडितत थःपिनिगु छेँया सामान चीके तकं मलानाच्वंगु दु ।

पीडितया नामय् चन्दा मकायेत ख्याच्वः
थ्व हे दथुइ सिन्धुपाल्चोकया जिल्ला प्रशासन कार्यालयं मेपिंके चन्दा कयाः राहत इनेगु ज्या मयायेत इनाप याःगु दु । खुसिबालं पीडितपिनि नामय् चन्दा कयाजूगु सिल धाःसा १ लाख जरिवाना व निदँया जेल सजायँ जुइगु ख्याच्वः नं बिउगु दु ।

सम्बन्धित बुखँ

LEAVE YOUR COMMENTS