मतया शुल्कय् २० प्रतिशत छुट

येँ – सरकारं छेँय् छ्यलीगु मतया शुल्कय् २० प्रतिशत छुट बीगु जूगु दु । थ्व छुट चैत महिनाया १५० युनिट तकया निंतिं जक जुइ । ऊर्जा मन्त्रालयय् शुक्रवाः च्वंगु नेपाल विद्युत प्राधिकरणया बोर्ड बैठकं थ्व निर्णय याःगु खः ।

कोराना भाइरसया संक्रमणया कारणं देय्न्यंकं लकडाउन जुयाच्वंगु अवस्थाय् आयश्रोतया म्होति जुइगु कारणं थ्व छुट बीगु निर्णय याःगु खः । थ्व इलय् ग्यासया अभाव जुइफुगुलिं इन्डक्सन भुतू छ्यलेत प्रोत्साहित यायेगु निंतिं नं थ्व निर्णय जूगु खँ धाःगु दु ।

थौंकन्हय् उत्पादन सम्बन्धी छुं नं गतिविधि मजुयाच्वंगुलिं मतया माग तसकं म्हो जुयाच्वंगु दु । मेमेबलय् १००० मेगावाटं अप्वः माग दुबलय् थौंकन्हय् ७ सय मेगावाट दःसा गायाच्वंगु दु ।

सरकारं आः २० प्रतिशत छुट बिल धाःसा प्राधिकरणयात ५० करोड बराबरया द्यापं जुइगु खँ धाःगु दु । थौंकन्हय् छेँय् जक मत छ्यलीपिं ३८ लाख ग्राहक दुसा थुकी मध्ये २७ लाख ग्राहक लय् १५० युनिट स्वयां म्हो जक विद्युत छ्यलीपिं खः ।