‘विप्लव समूह वार्ता यायेत तयार मदु’
येँ – सरकारं गठन यानातःगु अधिकार सम्पन्न उच्चस्तरीय राजनीतिक वार्ता पुचलं नेपाल कम्युनिष्ट पार्टी विप्लव समूह वार्ताया निंतिं तयार मजूगु खँ धाःगु दु । म्हिगः छगू पत्रकार सम्मेलन यानाः वार्ता पुचलं उगु खँ धाःगु खः । तर विशेष सूत्रं धाःसा विप्लव पुचलं वार्ता यायेगु खःसा नेकपाया वर्तमान अध्यक्ष प्रचण्ड लिसे जक वार्ता यायेगु अडान काःगु खँ सीदुगु दु ।
लिसें विप्लवं वार्ता यायेन्ह्यः जनयुद्धया इलय् सीपिं झिंन्हयद्वः जनताया जिम्मेवारी नं कायेमाःगु अडान कासें यदि सीपिं जनताया जिम्मेवारी मकायेगु खःसा वार्ताया औचित्य मदु धकाः वार्तायात अस्वीकार याःगु खः ।तर वार्ता पुचलं थःगु प्रतिवेदनय् ‘नेपाल कम्युनिष्ट पार्टी विप्लव समूहलिसे वार्ता पुचलं संयोजक व सदस्यतय्सं अनौपचारिक रुपं केन्द्रीय स्तरया नेतात लिसे यक्वः सम्वाद यानाः नं उगु पुचः वार्ताया निंतिं सकारात्मक मजूगुलिं वार्ता यायेगु प्रक्रिया मन्ह्याः धकाः न्ह्यथनातःगु दु ।
अथेहे तराईलय् संघर्ष यानाच्वंगु सीके राउत पुचः लिसे वार्ता यायेगु जिम्मेवार थःगु कार्य देशय् मलाः धासें वार्ता मयानागु खँ वार्ता पुचलं धाःगु दु । ‘नेपाःया राष्ट्रिय एकता, सार्वभौमसत्ता, अखण्डता लगातय संविधान व राज्य विरुद्धया गतिविधि यानाच्वंगु सिके राउत पुचः लिसे वार्ता थुगु पुचःया कार्यदेश दुने मलाःगुलिं उगु पुचः लिसे वार्ता यायेगु उपयुक्त मखना’ वार्ता पुचःया संयोजक सोमप्रसाद पाण्डे धयादीगु दु ।
वार्ता पुचः नीस्वनेधुंकाः स्वंगू पुचलं ल्वाभः बुझे यानाः मूलधारया राजनीति वयेधुंकूगु व स्वंगू पुचः न्हापा हे ल्वाभः लः ल्हायेधुंकूगु व वार्ता पुचःया रोहवरय् राजनीतिक प्रक्रियाय् ब्वति कयागु घोषणा यायेधुंकूगु खँ धाःगु दु ।
LEAVE YOUR COMMENTS