युभेन्टस, म्याड्रिड, रोमा, सिटी नकआउट चरणय्

च्याम्पियन्स लिगया समुह एच अन्र्तगत म्हिगः जूगु कासाय् युभेन्ट्स भ्यालेन्सियायात बुकाः नकआउट चरण प्रवेश याःगु दु । रक्षात्मक कासा म्हितूगु भ्यालेन्सियायात युभेन्टसं १—० गोलं बुकूगु खः । युभेन्ट्सया निंतिं क्रोएसियन कासामि मारियो मान्जुकिचं छगू जक गोल याःगु खः । युभेन्ट्सयात भ्यालेन्सियाविरुद्ध गोल यायेत तसकं थाकल ।

न्हापांगु हाफय् स्वम्ह फरवार्ड मारियो मान्जुकिच, क्रिष्टियानो रोनाल्डो व पाउलो डिबालायात गोल यायेगु ह्वःताः तकं चूमलात । निगूगु हाफय् युभेन्ट्सं कासाय् सुधार हल, अले ५९ औं मिनेटय् रोनाल्डोया पासय् मान्जुकिच गोल यात । कासाया अन्तिम इलय् भ्यालेन्सियायात बराबरी यायेगु मौका वःगु खःसा गोल धाःसा यायेमफुत ।

समुह एच अन्र्तगत जूगु मेगु कासाय् म्यानचेष्टर युनाइटेडं योङ ब्वाइजयात १—० गोलं बुकाः नकआउट चरणय् प्रवेश याःगु दु । युनाइटेडया निंतिं कासाया ९० औं मिनेटय् फेलानीं गोल याःगु खः ।अथेहे समुह ‘जी’ इ च्वंगु रियल म्याड्रिड व इटालियन क्लब रोमा नं निगूगु चरणय् वंगु दु । म्याड्रिडं रोमायात बुकूगु खःसां निगुलिं टिम निगूगु चरणय् वंगु खः ।

निगू गोलं बुकेगु झ्वलय् म्याड्रिडं निगुलिं गोल निगूगु हाफय् याःगु खः । रियलया निंतिं ग्यारेथ बेलं कासाया ४७ औं मिनेटय् व लुकास भाज्क्वेलं ५९ औं मिनेटय् गोल याःगु खः । थ्व हे समूहय् लाःगु सिएसके मस्काें भिक्टोरिया प्लेजननाप बुइवं रोमा अन्तिम १६य् प्रवेश याःगु खः ।

समूह एफय् च्वंगु म्याचेष्टर सिटी नं च्याम्पियन्स लिगया अन्तिम १६य् प्रवेश याःगु दु । निक्वः तक लिउने लायेधुंकूगु म्याचेष्टर सिटी फ्रेन्च क्लब लियोननाप बराबरी म्हिताः निगूगु चरणय् वंगु खः । सिटी व लियोनं निगू निगू गोलया बराबरी म्हितूगु खः । बराबरी लिपा लियोन निगूगु चरण वनेत समूहया अन्तिम कासाया लिच्वः पिमानिगु जूगु दु ।

समूह एफ अन्तर्गत जूगु मेगु कासाय् शाख्तर डोनेस्कं होफेनहेमयात ३—२ गोलं बुकाः अन्तिम १६य् प्रवेशया आशा ल्यंकूगु दनि । होफेनहेम धाःसा च्याम्पियन्स लिग पिने लाःवंगु दु ।

अथेहे समुह ई पाखें बार्यन म्युनिख व आजाक्स च्याम्पियन्स लिगया नकआउट चरणय् प्रवेश याःगु दु । बार्यन म्युनिख बेन्फिकायात ५—१ व आजाक्सं एथेन्सयात २–० गोलं बुकाः नकआउट चरण प्रवेश यागु खः । बेन्फिकायात ५—१ गोलं बुकेगु झ्वलय् आर्जेन रोबिन व रोबर्टो लेवान्डोस्की निगू निगू गोल व रिबेरीं छगू गोल याःगु खः । बेन्फिकाया निंतिं छगू जक गोल फर्नान्डेसं याःगु खः ।