आत्मघाती गोलं जर्मनी बुत

यँ – युरो कपया दावेदार जर्मनी आत्मघाती गोलया कारणं थःगु न्हापांगु कासाय् पराजय फयेमाःगु दु । मंगलवाः चान्हय् जूगु कासाय् जर्मनीयात फ्रान्सं १–० गोलं बुकूगु खः । कासाया २० औं मिनेटय् जर्मनीया डिफेन्डर म्याट्स हुमेल्सं बल क्लियर यायेगु झ्वलय् थःगु हे पोस्टय् बल दुछ्वया बिउगु खः ।

गु्रप अफ डेथया रुपय् कयातःगु समूहय् एफय् थःगु न्हापांगु कासाय् पराजय फयेमालेवं जर्मनीयात विजेता व उपविजेता जुयाः निगूगु चरणय् वनेत कठीन जुइगु खनेदुगु दु । थ्वयां न्ह्यः थ्व समूहय् जूगु कासाय् पोर्चुगलं हंगेरीयात ३–० गोलं बुकूगु खः । फ्रान्स नं त्याःसां थ्व समूहय् गोल अन्तरया ल्याखं पोर्चुगल न्ह्यःने लाःगु दु ।

आः समूह एफय् पोर्चुगल व फ्रान्सया ३÷३ ल्यां जूगु दुसा जर्मनी व हंगेरीया शून्य शून्य दु । युरो कपय् प्यंगू टिमय् थःगु समूहय् स्वंगूगु थासय् लाःसां नकआउट चरणय् दुहां वनेफइगु प्रावधान दुगुलिं थ्व समूहं जर्मनी, फ्रान्स व पोर्चुगल स्वंगूलिं निगूगु चरणय् दुहां वनीगु अनुमान यानातःगु दु । युरोया प्रावधान कथं समूह चरणय् स्वंगूगु थासय् लाःगु प्यंगू उत्कृष्ट टिम निगूगु चरणय् दुहां वनेखनी ।