दबाब विरुद्ध पुलांपि उपकुलपतिपिं

येँ – चिकित्सा शिक्षा आयोगया उपाध्यक्षयात सरकारी पदाधिकारीतय्सं अनुचित दबाब बिउगु खँ सार्वजनिक जुइवं थीथी विश्वविद्यालयया झिंनिम्ह पुलांपिं उपकुलपतितय्सं थन छगू मंकाः विज्ञप्ति पिकासें सरकारयात विधि हाचां गायाः ज्या मयायेत सुझाव बिउगु दु ।

पूर्व उपकुलपतिपिनि विज्ञप्तिइ प्रधानमन्त्रीया गृह जिल्ला झापाया बी एण्ड सी मेडिकल कलेजयात काठमाडौं विश्वविद्यालयपाखें सम्बन्धन बीत स्वयम् प्रधानमन्त्री व शिक्षा मन्त्रीं चिकित्सा शिक्षा आयोगया उपाध्यक्षयात दबाब बिउगु दुर्भाग्यपूर्ण जूगु खँ धयातःगु दु ।

विज्ञप्तिइ धयातःगु दु, ‘काठमाडौं विश्वविद्यालयं चिकित्सा शिक्षा सञ्चालनया निंतिं सम्बन्धन बी फइगु ल्याःया सीमा पुलेधुंकूगुलिं पूर्वाधार हे मगाःनिगु बी एण्ड सी मेडिकल कलेजयात सम्बन्धन व चिकित्सा शिक्षा आयोगया स्वीकृति बीकेत विधिया शासन हाचांगायाः सरकारं याःगु ज्या खदपूर्ण जू ।’

पुलांपिं उपकुलपतिपिं महेशकुमार उपाध्याय, सुरेशराज शर्मा, नवीनप्रकाश जंग शाह, कैलाशनाथ प्याकुरेल, महेश्वरमान श्रेष्ठ, जयराज अवस्थी, केदारभक्त माथेमा, कमलकृष्ण जोशी, तोरणबहादुर कार्की, खगेन्द्र भट्टराई, हिराबहादुर महर्जन व नरेशमान बज्राचार्यपाखें उगु विज्ञप्ति जारी याःगु खः ।

सम्बन्धित बुखँ

LEAVE YOUR COMMENTS