स्वीट्जरल्यान्ड व वेल्स दथुया कासा बराबर

येँ– युरो कपया स्वीट्जरल्यान्ड व वेल्स दथुया कासा १–१ गोलया बराबरीइ क्वचाःगु दु । शनिवाः जूगु कासा थुगुसीया युरोकपया न्हापांगु बराबरीइ क्वचाःगु कासा खःसा स्वीट्जरल्यान्ड व वेल्स दथुइ नं थ्व न्हापांगु बराबरीया कासा खः । स्वीस व वेल्स दथुइ थ्वयां न्ह्यः आःतक न्हय्गू कासा जुइधुंकूगु दुसा थ्व कासा छगू नं बराबरी जूगु मदु । न्हापा जूगु न्हय्गू कासा मध्ये स्वीसं न्यागू व वेल्सं निगू कासा त्याकूगु खः ।

शनिवाः स्वीट्जरल्यान्डया निंतिं इम्बोलों न्हापांगु गोल याःगु खः । न्हापांगु हाफ बराबरी जुइधुंकाः निगूगु हाफ सुरु जूगु प्यंगूगु मिनेटय् हे इम्बोलों गोल याःगु खः । जारदन साकिरिं थ्वाःगु कर्नरय् सुन्दर हेड यासें इम्बोलों गोल याःगु खः । इम्बोलों थ्वयां १ मिनेट न्ह्यः जक गोलया बांलाःगु कुतः याःगु खः तर वेल्सया गोलकिपरं बचे यानाबिउगु खः । वेल्सं नं कासाया ७३ औं मिनेटय् कर्नरया ग्वाहालिं हे बराबरीया गोल याःगु खः ।

वेल्सयात वःगु कर्नरयात सर्ट पास लिपा पोस्टय् जूगु प्रहारय् केइफेर मूरं हेडपाखें हे बराबरीया गोल याःगु खः ।
थ्व बराबरीइ लिपा समूह ए इटली ३ अंक सहित शीर्षस्थानय् दु । इटलीं म्हिगः टर्कियात ३–० गोलं बुकूगु खः ।

थौंया मेगु कासा डेनमार्क व फिनल्यान्ड दथुइ बहनी ९ः४५ बजे जुइ ।