जनजाति मदु धाःगुया विरोधय् कन्हय् असनं तःजिगु ‘र्याली’
येँ – जनजाति मदु धाःगुया विरोधविकासया नामय् राज्यं हःगु थीथी योजनापाखें विस्थापनय् लायेत्यंपिं स्थानीय जनतां वंगु वालय् याःगु प्रदर्शनय् जूगु प्रहरी दमन व उपत्यका विकास प्राधिकरणया प्रमुख भाइकाजी तिवारीं आः नकतिनि न्यूज ट्वान्टी फोर टेलिभिजनय् न्ववासें स्वनिगलय् सुं नं आदिवासी धइपिं मदु धयादीगुया विरोधय् कन्हय् शुक्रवाः येँय् छगू तःधंगु शान्तिपूर्ण ¥याली पिकाइगु जूगु दु ।
तिवारीया उगु अभिव्यक्ति पिहां वयेवं म्हिगः उपत्यकाव्यापी सडक विस्तार पीडित संघर्ष समितिया बैठक च्वनाः तत्काल हे उकिया प्रतिक्रिया स्वरुप कन्हय् छगू शान्ति ¥याली पिकायेगु निर्णय याःगु खः ।
‘आदिवासी जनजातिया समुदाय, संस्कार, सम्पदा, सभ्यता नेपाःमि व नेपाःया पहिचान ल्यंकेत छप्पँ जुइ नु, नागरिकया मौलिक हक सुनिश्चितता, सम्पदा संरक्षणया लिसें गैरन्यायिक सडक विस्तार विरुद्ध शान्तिपूर्ण ¥याली’ धइगु नारा बिसें थ्व ¥याली पिथनेत्यंगु खः ।
कन्हय् न्हिनय् ३ बजे थनया असनं थ्व ¥याली पिहां वइगु खँ धाःगु दु ।
असनं शुरु जुयाः ¥याली वंघः, न्हू सतक, खिचापुखू, पुलांगु नगरपालिका, ओमबहाः, यंगाः, दँलाछि, हिउमत, जोशी देगः, क्वहिति, भिन्द्यःत्वाः, मरु, यतखा, न्यत, क्षत्रपाटी, जेपी रोड, थँहिति, त्यरः जुयाः असनय् हे थ्यंकाः क्वचाइगु खँ धाःगु दु । ¥यालीइ ब्वति कायेत ग्वसाः खलकं सकसितं इनाप याःगु दु ।
संघर्ष समितिं वंगु वालय् माइतीघर मण्डलाय् याःगु धर्ना ज्याझ्वलय् प्रहरीं हस्तक्षेप यानाः बर्बर दमन याःबलय् च्याम्ह प्रदर्शनकारी घाःपाः जूगु खःसा झिंस्वम्हेसित ज्वनाः चछि कुना हःगु खः ।
भाइकाजीया धापू छु ?
न्यूज २४ टेलिभिजनय् नांजाःम्ह पत्रकार रवि लामिछानेया ज्याझ्वलय् सडक विस्तार व उकिं स्थानीय जनतायात उठिबास यायेत्यंगु बारे जूगु खँल्हाबल्हाय् उपत्यका विकास प्राधिकरणया प्रमुख भाइकाजी तिवारीं स्वनिगलय् सुं नं आदिवासी जनजाति धइपिं मदु, झीपिं सकलें नेपाली जक जुयाः छप्पँ जुयाः च्वंच्वनागु दु धकाः न्ववानादीगु खः । लुमंकेबहः जू, नेपालय् ५९ गू आदिवासी जनजाति पुचः दु धकाः नेपाल सरकारं हे मान्यता बियातःगु दुसा थ्व समुदायया विकासया लागिं धकाः अलग्ग निकाय तकं गठन यानातःगु दु । तिवारीया थ्व धापूयात आः आदिवासी जनजाति महासंघ लगायत मेमेगु नं थीथी जनजाति पुचःतय्पाखें नं विरोध यायेगु तयारी जुयाच्वंगु खँ सीदुगु दु ।
LEAVE YOUR COMMENTS