
सरोकारवालातय् सुझाव कयाः जक न्ह्याः वनीगु
येँ – गुथि विधेयक विरुद्ध स्थानीय जनता आन्दोलनय् कुहां वयेवं उगु विधेयकयात गथे खः अथे हे पारित याकेगु अडानपाखें सरकार लिचिउगु दु । म्हिगः भूमि व्यवस्था सहकारी तथा गरिबी निवारण मन्त्रालयपाखें प्रवक्ता जनकराज जोशीं छगू वक्तव्य जारी यासें गुथि विधेयकयात कयाः आः पिहां वःगु विवादया सन्दर्भय् सरोकारवालातय् चिउताः व सुझावयात कयाः उच्चसम्मान यानाः न्ह्याः वनेत प्रतिवद्धता व्यक्त याना धाःगु दु ।
गुथि विधेयकया विवादयात कयाः म्हिगः नेकपाया सभासदपिंसं राष्ट्रियसभाया विधायन समितिया सभापति पर्शुराम मेघी गुरुङयात नाप लानाः सहलह याःगु खः । सांसदतय्सं गुथि विधेयकयात कयाः पुनर्विचार यायेमाःगु माग याःगु दु । ३ नम्बर प्रदेशया सांसद बसन्त मानन्धरं कनादी कथं सभापति गुरुङं स्टेक होल्डर व सम्बन्धित गुथिलिसे सहलह मयासे राष्ट्रिय सभाय् थुकिया बारे सहलह मयायेगु बचं बियादीगु खः ।
गुरुङयात सांसदपिं रामवीर मानन्धर, जीवनराम श्रेष्ठ व बसन्त मानन्धरं नापलानादीगु खः ।अथे हे म्हिगः हे संसदय् दर्ता जूगु गुथि विधेयकयात कयाः सांसदपिंसं भूमि व्यवस्था सहकारी व गरिबी निवारण मन्त्री पद्माकुमारी अर्यालयात नं नापलानाः स्वनिगःया जनताया चिउताः बारे खँल्हाबल्हा याःगु खः ।
उगु इलय् मन्त्री अर्यालं विधेयकयात कयाः सुधार यायेगु प्रतिवद्धता प्वंकादीगु खँ नं सांसद मानन्धरं ‘नेपालभाषा टाइम्स’ यात कनादिल । मन्त्री अर्यालं नेपालय् आपालं गुथि दुगु व उकियात व्यवस्थापन यायेमाःगु आवश्यकता दुगु धासें तर थःपिंसं स्थानीय जनता लिसे सहलह यानाः जक विधेयकयात अन्तिम रुप बीगु बचं बियादीगु खः ।
सांसद जीवनराम श्रेष्ठं विधेयकया कारणं जनस्तरय् असन्तुष्ट ब्वलनाच्वंगुलिं तत्काल विधेयक लित कायेमाःगु माग यानादीगु खः । अथेहे सांसद रामवीर मानन्धरं नं विधेयक जनभावना अःखः जूगुलिं लितकायेगु पाय्छि जुइ धयादीगु खः ।
उकथं हे प्रदेश ३ सांसद मानन्धरं संविधान कथं गुथिया बारे निर्णय यायेगु अधिकार प्रदेशसभाया जूगुलिं संसदं उगु विधयेक लित कायेमाःगु माग यानादीगु खः । सहलह ज्याझ्वलय् सांसदपिं लगायत येँ महानगरपालिका १८ वडाया वडाध्यक्ष लिसें सम्पदा विभागया प्रमुख न्हुच्छेकाजी महर्जन व थीथी गुथिया गुथियारपिं दुथ्याःगु खः ।
LEAVE YOUR COMMENTS