तालिबानं छेँय् छेँय् वनाः विदेशी सेनायात ग्वाहालि याःपिं मालाच्वंगु दुु – संयुक्त राष्ट्र संघ

एजेन्सी- संयुक्त राष्ट्र संघं तालिबानतय्सं अफगानि नागरिकतय् छेँय् छेँय् वनाः विदेशी सेनायात ग्वाहालि याःपिंत मालाच्वंगु खँ धाःगु दु । संयुक्त राष्ट्र संघया दस्तावेजकथं तालिबानं अमेरिकी सेना, नेटोया सेना व पूर्व अफगान सरकारयात ग्वाहालि याःपिंत छेँय् छेँय् वनाः मालाच्वंगु व ग्वाहालि याःपिं मनूतय्सं आत्मसमर्पण मयात धाःसा उमि छँेजःपिंत ज्वनायंकेगु निसें स्यानाबिइगु तकया ख्याच्वः बियाच्वंगु दु ।

राष्ट्रसंघया निंतिं गोप्य सूचं संकलन याइगु नर्वेजियन सेन्टर फर ग्लोबल एनालाइसिसं (आरएचआइपीटीओ, रिप्टाें) थ्व रिपोर्ट बिउगु खः । तालिबानं यक्व हे मनूतय्गु धलः दयेकातःगु दुगुुलिं यक्व मनूत खतराय् दुगु व अज्याःपिंसंं आत्महत्या तकं यायेफइगु रिपोर्टय् धयातःगु दु । तालिबानं धाःसा पत्रकार सम्मेलन यानाः दक्वसित आममाफी बिइगु व सुयात नं ब्वलाः मसायेगु धाःगु खः ।

अफगानी नागरिकतय्सं नं तालिबानयात विश्वास याःगु मदुनि । अफगानिस्तानया थीथी थासय् तालिबानविरुद्ध प्रदर्शन नं जुयाच्वंगु दु । अफगानिस्तानया जलालाबादय् अफगानिस्तानया राष्ट्रिय ध्वाँय्या समर्थनय् जूगु प्रदर्शनय् तालिबानं प्रदर्शनकारीतय्त गोली कयेकूगु खः । बिहिवाः अफगानिस्तानया असादबादय् अफगानिस्तानया १०२ औं स्वतन्त्रता दिवसय् नं तालिबानं गोली कयेकूबलय् निम्ह मनू सीगु खः । अथे हे भारतीय सञ्चार माध्यमं बिउगु समाचारकथं तालिबानं अफगानिस्तानय् च्वंगु भारतीय दूतावासया ताः तछ्यानाः दुहां वनाः महत्वपूर्ण भ्वं कयाः यंकूगु दु ।