नांजाःम्ह चित्रकार एकाराम सिं मंत

येँ- चित्रकलाया नांजाःम्ह कलाकार एकाराम सिं मंत । वय्कः वंगु स्ववाः न्ह्यवंनिसें कोरोना संक्रमित जुयाः त्रिपुरेश्वरया भ्याली अस्पतालय् वासः याका च्वनादीम्ह खः । वासः याकुयाकुं हे थाैं सनिलया ६ बजेपाखे वय्कः मदुगु खः । वय्कः ५९ दँ दुम्ह खः ।

उपचारया झ्वलय् दथुइ छुं भचा सुधार जूगु खःसां हानं उसाँय् मदयाः स्वन्हु न्ह्यवंनिसें भेन्टिलेटरय् तये माःगु खः । तर भेन्टिरलेटरय् तयाः नं स्वास्थ्य सुधार मजूगु खँ छेँजःपिंसं धाःगु दु ।
कलाकार एकाराम सिं नांजाःम्ह कलाकारया लिसें नेवाः कला परम्पराया बारे ज्ञाता नं खः । वय्कलं नेवाः समाजया कला, संस्कृति, संस्कार लगायत आपालं विशिष्ट ख्यःलिसे सम्बन्धित कला सिर्जना यानादीगु दु । लिसें वय्कलं नेवाः लोकबाखंया लिधंसाय् कमिक्स नं च्वयादीगु दु ।

येँ महानगरपालिकापाखें थुगु दँनिसें लागू याःगु नेपालभाषाया पाठ्यक्रम ‘येँ देय् म्हसीका’ या छगू तगिंनिसें च्यागू तगिं तकया सफूयात माःगु चित्रत नं वय्कलं हे च्वयादीगु खः । वय्कलं नेपालभाषां पिहां वःगु आपालं मचा पत्रिका व मचा सफुतिइ मस्तय्त ल्वःगु आकर्षक किपा नं च्वयादीगु दु ।

वय्कः मदयाः नेपाःया कला ख्यःयात तःधंगु क्षति जूगु अनुभव कला ख्यलं याःगु दु । मदुम्ह कलाकार सिंया जहान लिसें काय् छम्ह व म्ह्याय् निम्ह दी ।