ल्वहं निकासीया निर्णययात प्यखेरं विरोध

येँ- सरकारं ल्वहं, फि व गिट्टी भारत निर्यात यायेगु योजना बजेट तःगु खँयात कयाः विरोध शुरु जूगु दु । सरकारं वंगु जेठ १५ गते सार्वजनिक याःगु बजेटया १९९ नम्बर बुँदाय् भारत लिसेया व्यापार घाटा म्हो यायेगु निंतिं चुरे क्षेत्रं ल्वहं, फि व गिट्टी भारत निर्यात यायेगु खँ न्ह्यथनातःगु दु ।

उगु निर्णय विरुद्ध जनता समाजवादी पार्टी (जसपा) संघीय परिषदया अध्यक्ष डा. बाबुराम भट्टराईं छगू ट्वीट यासें धयादीगु दु, ‘झीगु बजेटया विमर्श गुलि दयनीय । अल्पविकास, बेरोजगारी, परनिर्भरताया दुष्चक्रय् लानाच्वंगु अर्थतन्त्रया गुणात्मक रुपान्तरणया निंतिं संरचनात्मक हिउपाः एजेन्डा ग्व ? भतिचा तलब भत्ता÷सामाजिक सुरक्षा भत्ता अप्वयेका बिउगुलिं सकसिया वाहवाही ? चुरेया गिट्टी, फि मियाः व्यापार घाटा ज्यनी ला ? बेरोजगारी चिली ला ?’

उकथं हे राष्ट्रिय जनमोर्चाया उपाध्यक्ष दुर्गा पौडेलं नं छगू प्रेस विज्ञप्ति जारी यासें सरकारं प्राकृतिक सम्पदा व खानीजन्य पदार्थयात तस्कर व माफियाया ल्हातय् बियाः वातावरणीय विनाश यायेत्यंगु द्वपं बियादीगु दु ।

विज्ञप्तिइ धयातःगु दु, ‘२०७१ सालनिसें पूर्ण रुपं बन्द यानातःगु ल्वहं गिट्टी निकासी आकाझाकां विदेश निकासी यायेगु योजना हःगु तसकं रहश्यपूर्ण दु, सरकारं ल्वहं, गिट्टी व फि निकासीया योजनां चुरे क्षेत्रय् दुगु मुक्कं तराई क्षेत्रया भूमिगत जलभण्डारया स्रोत व जैविक विविधतायात नष्ट याइ, वातावरणीय सन्तुलनय् गम्भीर लिच्वः लाकी ।’

सरकारया उगु नीतियात नेपाली कांग्रेसया नेता गगन थापा, महेश आचार्यपिसं नं विरोध यानादीगु दुसा वरिष्ठ पत्रकार किशोर नेपाल व खगेन्द्र संग्रौला नं ट्विट मार्फत विरोध यानादीगु दु ।

थ्वहे झ्वलय् अर्थ मन्त्रालयं म्हिगः छगू प्रेस विज्ञप्ति पिकासें चुरे क्षेत्रया संरक्षण व सम्बद्र्धन यायेत मन्त्रालय प्रतिबद्ध जूगु खँ धाःगु दु ।