भुखाय् पीडितयात अर्थमन्त्रीया आश्वासन

येँ – भुखाचं पीडित जनतायात २ प्रतिशत ब्याजदरं त्यासा बीगु खँय् अर्थमन्त्री डा. युवराज खतिवडा सकारात्मक जूगु खँ पन्तिया भुखाय् पीडित शम्भुलाल श्रेष्ठं ‘नेपालभाषा टाइम्स’ यात कनादिल ।

म्हीग भुखाय् पीडिततय् प्रतिनिधि व अर्थमन्त्री दथुइ जूगु अनौपचारिक खँल्हाबल्हाय् अर्थमन्त्री खतिवडां राष्ट्र बैंकया गभर्नरयात सःताः थुकिया बारे न्यनेकने यायेगु बचं बियादीगु खँ नं वय्कलं कनादिल ।

थ्व बारे राष्ट्र बैंकया गभर्नरं भुखाय् पीडित जनतायात तत्कालिन मन्त्रिपरिषदं विशेष परिस्थितिइ निर्णय यानाः म्होतिं न्यादँ व अप्वलय् झिदँ तकया निंतिं त्यासा बीगु धकाः निर्णय याःगु जुयाः आः नं मन्त्रिपरिषदं हे निर्णय यायेत थम्हं इनाप यानागु खँ कनादीगु खः । थ्व बारे खँ न्ह्यथंबलय् अर्थमन्त्री खतिवडां निर्णय याकेत मन्त्रिपरिषद तक यंकेम्वाः धासें थ्व ज्या थम्हं हे यायेफु धयादीगु खः ।

भुखाय् पीडितलिसे खँ ल्हायेगु झ्वलय् अर्थमन्त्रीं राष्ट्र बैंकं हथासं निर्णय याःगु धासें भुखाचं पीडित जनताया निंतिं थम्हं फुगु ग्वाहालि यायेगु बचं नं बियादीगु खः ।

छन्हु निन्हुया दुने गभर्नरलिसे सहलह यानाः पीडित जनतायात राहत बीगु खँ धासें अर्थमन्त्रीं उकिया जानकारी याकनं हे भुखाय् पीडित जनतायात बीगु खँ धाःगु खः ।

तःभुखाय् ब्वयेधुंकाः सरकारं वाणिज्य बैंकयात सर्कुलर यासें भुखाचं पीडित जनतायात २ प्रतिशत ब्याजदरं न्यादँनिसें झिदँ तक त्यासा बीत निर्देशन बिउगु खः ।

तर आः वयाः राष्ट्र बैंकं ऐन संशोधन यानाः पुनर्कर्जा निदँया निंतिं जक बीगु धायेवं पीडित जनता थःपिं आः छेँ तकं लिलामय् लाइगु ग्याःचिकु ब्वलनाच्वंगु दु ।

२ प्रतिशत ब्याजदरं २५ लाख तका त्यासा काःपिंसं मासिक किस्ता २५ हजार तका जक पूसा गाःगु खःसा आः बैंक ब्याजदर सरह पुलेमाल धाःसा ५० हजार तका पुलेमालीगु जुइ ।