ने. सं. ११४४ ञलाथ्व दशमी -

भारत छाय् जुजु विरुद्ध वन ?

येँ- नेपालय् राजतन्त्र अन्त्यया लागिं तत्कालीन माओवादी लगायत राजनीतिक पार्टीत सक्रिय जुयाच्वंगु इलय् भारतं नेपाःयात ‘भूटान थें जुयाः च्वनेगु खःसा साथ बी’ धइगु प्रस्ताव छ्वया हःगु व तत्कालीन जुजु ज्ञानेन्द्रं उकियात अस्वीकार यायेवं भारत पूवंक हे राजतन्त्र मदयेका छ्वयेगु पक्षय् वंगु खँ पिहां वःगु दु ।

वि.सं. २०६२ सालया कार्तिकय् बंगलादेशया राजधानी ढाकाय् जूगु सार्क शिखर सम्मेलनय् भारतया तत्कालीन प्रधानमन्त्री मनमोहन सिंहं जुजु ज्ञानेन्द्रलिसे ‘वन टु वन’ वार्ता यायेगु झ्वलय् अज्याःगु प्रस्ताव तःगु जुयाच्वन । तर ज्ञानेन्द्रं उकियात तप्यंक हे अस्वीकार यायेवं मनमोहन सिंह ख्वाः ह्याउँकाः लिहां वन । तर लिहां वनेवं भारत नेपाली राजतन्त्र चीकेगु लाइनय् पूवंक हे वंगु खनेदु ।

जुजु ज्ञानेन्द्रं थ्व खँ अबले थः नापं तुं बंगलादेश थ्यंम्ह वरिष्ठ पत्रकारपिं पी. खरेल व मनोरञ्जन जोशीलिसे विमान दुने हे च्वनाः ‘शेयर’ यानादीगु जुयाच्वन । पत्रकार पीं खरेलं आः नकतिनि बीबीसी नेपाली सेवाया पत्रकार बिष्णु पोखरेलिसे खँ ल्हासें खुलासा यानादीगु खः ।

जुजु ज्ञानेन्द्रं मनमोहन सिंहलिसेजूगु खँ थःपिंत कंगु धकाः पत्रकार खरेलं दावी याःसां उकिया स्वतन्त्र पुष्टि धाःसा जुइ मफुनि । मेम्ह पत्रकार जोशीं धाःसा अबले जुजु ज्ञानेन्द्रं धाःगु खँ थःत ल्वःमने धुंकल धयादीगु दु । पत्रकार खरेलं धाःसा जुजु ज्ञानेन्द्रं धाःगु थ्व खँ आः थम्हं पिकायेत्यनागु न्हूगु सफुली समेत दुथ्याकेत्यनागु खँ कनादीगु दु ।

सार्कया ढाकाय् जूगु सम्मेलनय् भारतं अफगानिस्तानयात सार्क दुजःया रुपय् दुथ्याकेमाः धकाः प्रस्ताव याःगु खःसा नेपालं चीनयात सार्कया पर्यवेक्षक कथं दुथ्याकेमाः धकाः प्रस्ताव याःगु खः । नेपाःया तर्फं जुजु ज्ञानेन्द्रं हःगु उगु प्रस्तावयात भारतं स्वीकार याःगु खःसां थुकिं यानाः ज्ञानेन्द्रयात स्वयेगु भारतया दृष्टिकोण धाःसा पूवंक हे नकारात्मक जुया वंगु खः ।

ढाकाय् मनमोहन सिंहलिसे जूगु उगु वार्ता लिपा हे भारतं ज्ञानेन्द्र विरुद्ध आन्दोलन यानाच्वंपिं नेपाली राजनीतिक पार्टीतय्त समर्थन याःगु व पार्टीतय् दथुइ १२ बुँदे सम्झौता नं सम्पन्न जूगु अनुमान दु ।
लुमंकेबहः जू, २०४६ सालय् नेपालय् जूगु आन्दोलनया इलय् नं भारतं नेपाःया जलश्रोत फुक्क थःपिंत बीमाःगु व नेपालं स्वंगूगु देशं ल्वाभः न्याये माल धाःसा थःपिंके अनुमति कायेमाः धइगु छगू लिखित प्रस्ताव हे नेपाःयात छ्वया हःगु खःसा उकियात तत्कालीन जुजु वीरेन्द्रं अस्वीकार याःगु खः ।