ने. सं. ११४४ कौलाथ्व पारू - नःलास्वनेगु

अनावश्यक यात्रु प्रतीक्षलय चिइकीगु

येँ – येँ महानगरपालिकां थःगु लागा दुनेच्वंगु यात्रु प्रतीक्षालय चिइकीगु जूगु दु । येँ मनपां अव्यस्थित रुपय् लानाच्वंगु बस स्टाय्ण्ड व यात्रु प्रतीक्षालय चिइकेत्यंगु खः ।येँ मनपां अनावश्यक यात्रु प्रतीक्षालय व बस स्टाय्ण्ड चिइकेगु निंतिं अध्ययन यायेत छगू कार्यदल नं गठन याःगु दु । येँ मनपा १८ वडा अध्यक्ष न्हुछेकाजी महर्जनया संयोजकत्वय् अध्ययन कार्यदलं गठन याःगु खः ।

येँ महानगरपालिकाया उपप्रमुख हरिप्रभा खड्गी श्रेष्ठया संयोजकत्वय् दुगु अधिकार सम्पन्न समिति अन्तर्गतया कार्यदलया संयोजक महर्जनलिसें येँ महानगरपालिकाया प्रवक्ता नापं येँ मनपा १५ वडाया अध्यक्ष ईश्वरमान डंगोल नं च्वनादीगु दु ।अध्ययन कार्यदलं येँया थीथी थासय् च्वंगु बस स्टायण्ड व यात्रु प्रतीक्षालयया अवस्थायात कयाः अवलोकन नं याःगु खः ।

अवलोकन लिपा गनं आवश्यक जूगु थासय् नं मदुगु व गनं धाःसा अनावश्यक रुपं तयातःगु व उकिं सहरी सुन्दरतायात हे कुरुप यानाच्वंगुलिं आः उकियात चिइकेगु जानकारी कार्यदलया संयोजक वडाअध्यक्ष महर्जनं बियादिल ।

स्थलगत अध्ययन अवलोकन लिपा अनावश्यक थासय् तयातःगु यात्रु प्रतीक्षलय चिइकेगु, आवश्यक थासय् निर्माण यायेगु, स्यनाच्वंगुयात भिंकेगु लगायत उकिया संचालनया निंतिं अधिकार सम्पन्न समितियात प्रतिवेदन लःल्हायेगु जानकारी बियादिल ।