ख्वनाया मुद्दा अन्तर्राष्ट्रियकरण याइगु

येँ – वल्र्ड नेवाः अर्गनाइजेशनया नायः लिसें थीथी पदाधिकारीपिंसं म्हिगः ख्वना भ्रमण यासें अन फास्ट ट्रायक लगायत थीथी विकासे परियोजनापाखें लाकीगु लिच्वः अवलोकन यानादिल । थ्व अवलोकनया झ्वलय् जूगु बःचाधंगु समारोहय् सम्बोधन यासें डब्लुएनओया नायः सिजन श्रेष्ठं विकासया नामय् स्थानीय जनतायात उठिबास यायेगु थ्व ज्याया विरुद्ध अन्तर्राष्ट्रिय ख्यलय् समेत सः तयेगु खँ कनादिल । ज्याझ्वलय् अन दुगु संघर्ष समितिया पदाधिकारीपिंसं ख्वनाय् आः जुयाच्वंगु ज्याखँ बारे जानकारी यानादिल ।अथे हे डब्लुएनओया पदाधिकारी–पिंत म्हिगः नेपालभाषा एकेदमिपाखें लसकुस यायेगु ज्या जुल । एकेदमिया किपुली च्वंगु ज्याकुथी वय्कःपिंत लसकुस यासें चान्सलर चित्तरंजन नेपालीं मतिनाया चिं लःल्हानादिल । सदस्य सचिव मल्ल के. सुन्दरं एकेदमिया गतिविधि बारे जानकारी यानादिल । म्हिगः हे वय्कःपिंत वाङ्मय शताब्दीपुरुष सत्यमोहन जोशीया बखुंबहाःस्थित छेँय् सांस्कृतिक ज्याझ्वः सहित लसकुस याःगु खः ।