मध्यपुर थिमिइ वृहत किपा ब्वज्या

थिमि- मध्यपुर संचार समाजया ग्वसालय् छन्हुया वृहत किपा ब्वज्या जुल । समाजं नेपाल भ्रमण वर्ष २०२० या सन्दर्भ लाकाः उगु वृहत किपा ब्वज्या याःगु खः ।मध्यपुर थिमिस्थित राष्ट्रिय विभूति शंखधर साख्वाःया झ्वाता दुगु थासय् जूगु किपा ब्वज्याय् मध्यपुर थिमि नगरपालिकाया झिंच्याम्ह फोटो पत्रकारया २३५ पाः किपा ब्वज्याय् दुथ्याःगु समाजया नायः बाबुकाजी साःछेँ श्रेष्ठं जानकारी बियादिल ।
मध्यपुर थिमि नगरपालिकाया प्रमुख मदनसुन्दर श्रेष्ठं उलेज्या यानादीगु किपा ब्वज्याय् थिमि नगरया कला, संस्कृति, जीवनशैली, सम्पदा, राजनीतिक विषयया किपा दुथ्याकातःगु खः ।

ब्वज्याया उलेज्या यासें नगर प्रमुख श्रेष्ठं नेपाल भ्रमण वर्ष–२०२० यात सफल यायेमाःगु खँय् बः बियादिसें नगर दुनेया थीथीकथंया फरक गतिविधिया विषययात दुथ्याकाः याःगु किपा ब्वज्यां मध्यपुर थिमि देय्यात म्हसीकेत ग्वाहालि याइगु विश्वास प्वंकादिल । भ्रमण वर्षय् मध्यपुरयात नं आकर्षणया केन्द्र दयेकेत थुकथंया ज्याझ्वलं ग्वाहालि याइगु वय्कःया धापू दु ।

मध्यपुर थिमि नगरपालिकाया प्रवद्र्धनय् सुथंनिसें सनिलय्तक न्ह्याःगु किपा ब्वज्याय् न्यासलं मल्याक अवलोकनकर्ताया सहभागिता दुगु खः । ब्वज्याय् संघीय संसदया महेश बस्नेत, राष्ट्रिय विभूति शंखधर साख्वाः प्रतिष्ठानया नायः चन्दनकृष्ण श्रेष्ठ, संस्कृति अध्ययेता गणेशराम लाछि, नेवाः पत्रकार राष्ट्रिय दबू केन्द्रीय नायः सुरजवीर वज्राचार्य, बासुदेव स्मृति प्रतिष्ठानया नायः लक्ष्मणशरण जोशी, जिल्ला समन्वय समितिया दुजः, मध्यपुर थिमि नगरपालिकाया थीथी वडाया वडाअध्यक्ष, स्थानीय समाजसेवी लगायत आपालं व्यक्तित्वपिनिगु नं सहभागिता दुगु खः ।