सीघःया चीभाः चैत्य भिंकेज्या

येँ- थनया सीघलय् च्वंगु चिभाः चैत्य भिंकेज्या जूगु दु । चीभाः चैत्यया संरक्षण यायेगु ल्याखं सक्रिय चीभाः चैत्य संस्थापाखें सीघलय् च्वंगु श्री शान्तिघट वज्रधातु चैत्य महाविहारया चैत्य चीभाः भिंकेज्या याःगु खः ।

संस्थापाखें सीघलय् च्वंगु झिंनिगः चीभाः चैत्यया स्यनाच्वंगु गजू दयेकेगु नापं आवश्यककथं भिंकेज्या याःगु खः । महाविहार संघया नायः शुभकाजी शाक्यं सीघः बहाःया चैत्यया गजूत धमाधम स्यना वनाच्वंगुलिं उकियात भिंकेत संरक्षण समितिइ तःक्वः हे सहलह जुयाच्वंगु इलय् संस्थापाखें भिंकेगु प्रस्ताव वःगु व संस्थाया हे कुतलं अज्याःगु सम्पदा संरक्षण यायेगु ज्या ताः लाःगु धासें लसता प्वंकादिल ।

लिसें वय्कलं थःपिनिगु चिउताःयात कयाः विहारया देगः व गजू भिंकेगु ज्याय् ग्वाहालि याःगुलिं संस्थायात सुभाय् नं देछानादीगु खः ।